Искәндәр Гайсин — беренче татар вайнеры (ВИДЕО)

Инстаграмда вайнерлар, блогерлар яңгырдан соң чыккан гөмбәләр кебек артканнан-арта баралар. Беренча татар блогеры — Татар малай икәнлеген барлык татар яшьләре дә беләдер. Ә беренче татар вайнеры кем икән? Искәндәр Гайсин үзен  беренче татар вайнеры дип атый. Әйдәгез, аның белән якыннан танышыйк.

zbiz_nhwunw

Искәндәр Гайсин

Үзбәкстанда Ташкент өлкәсендә туган, Нурлат районы Көрнәли Әмзә авылына күчеп, 3 ел яшәгәннән соң, Нурлат шәһәренә күченә.

И.В.Әүхәдиев исемендәге Казан музыка көллиятендә укый. Беренче курсны тәмамлагач, хәрби хезмәткә китә. Хәзерге вакытта,  көллияттә икенче курсны тәмамлап, Бөтендөнья татар конгрессының делегаты булып эшли.

-Искәндәр, беренче видеоларныңны кайчан төшерә башладың? 

-Видеоларны күптәннән төшерәм, тик аларның монтажлары бик югары дәрәҗәдә түгел иде. 2016 елның кышыннан төшергән видеоларны эшкәртү өчен программа тапкач, аны өйрәндем дә, кызыклы хезмәткә чумдым. Хәзер башка блогерлар  белән элемтәдә торам. Бер-беребезгә реклама, репостлар  ясыйбыз.

-Видеолар төшерү өчен илһам каян аласың? Бәлки, сиңа «илһамия» киләдер?

-Мине татар җырлары илһамландыра. Моңсу җырлар тыңлаганнан соң башка ниндидер кызык идея килә. Аннары шуны тормышка ашырам. Кайвакыт әти-әнием дә, шундый видео яздыр, болай эшләп кара, дип киңәшләр бирә.

-Видеоларны төшерергә сиңа кем ярдәм итә?

-Беренче чиратта, дуслар. Кайвакыт танышлар арасында вакытлары булганнар яки видеода катнашырга  теләкләре булганнар да төшә.

-Бер видеоны төшерергә күпме вакыт кирәк?

-Бер видео төшерү өчен күп көч сарыф ителә. Төшерү 4-5 сәгать вакытны алса, монтажга 5-6 сәгать вакыт китә. Мин аларны төшергәч, шул ук көндә нәтиҗәсен дә күрәсем килә, алайса көне буе күңелем тыныч түгел, йоклый алмыйм.

Искәндәрнең яраткан вайны: 

-Тәнкыйть сүзләре ишетеләме?

-Тәнкыйтләп язылган бер-ике язмага тап булдым, тик аларга аерым игътибар итмәдем. Тәнкыйтькә тыныч карыйм.

-Киләчәккә нинди планнар  корасың?

-Төрле типтагы, жанрдагы, форматтагы видеолар төшерәсем килә. Мин бит әле җырлыйм да. Ул минем төп эшем, ә вайннар төшерү — хоббием.

Хәзер татар вайнерлар күбәеп бара. Мин аларның инстаграмга беренче видео куйган вакытлары белән, үзем куйган вакытны чагыштырып карадым да, шундый нәтиҗәгә килдем: мин аларга караганда вайнны беренчерәк куйганмын булып чыкты. Шулай итеп, мин үземне беренче татар вайнеры дип яздым.

-Искәндәр, синнән тагын да күбрәк, кызыграк видеолар көтеп калабыз. Җыр өлкәсендә дә сиңа зурдан-зур уңышлар телибез.

Дуслар, инстаграм битендә Искәндәр куйган соңгы видеоны да карагыз. Көн буена җитәрлек позитив алырсыз. 🙂

Комментарий язарга