Көрәшчедән торт рецепты

Русиянең спорт остасы, көрәшче Азат Нурмөхәммәтовның Сабан туйларда бил алышырга оста икәнен белә идек инде. Әле бу ялларда гына Мингәрдә үткән көрәш буенча дөнья чемпионатында катнашып, чемпион титулына лаек булды ул! Котлыйбыз, Азат! Ә сез аның аш-суга да кулы ятып торганын белә идегезме? «Идел» укучыларын ул июнь санында үзе яратып әзерләгән «Кырмыска» торты рецепты белән бүлешеп сөендерде. Менә ул тылсымлы рецепт!

фото (1)

Мин үзем кырмыска тортын бик яратам. Каян барлыкка килүен дә, фәлсәфәсен дә белмим, әмма аны минем шикелле тәмлетамаклар өчен уйлап чыгарганнардыр, дип фаразлыйм.

Баллы ризыкларга мәхәббәтне ике апам уяткандыр. Балачактан бик сыйладылар инде үземне. Әни эшкә киткәндә, аларга ашарга пешерергә, өйне җыештырырга кушып китә иде. Мин исә, аларның өйрәнчек тортларын, тәмлүшкәләрен кабып карап, беренче булып бәя бирүче булдым. Кырмыска тортын шулкадәр тәмле итеп пешерәләр иде, телең йотарлык! Хәзер менә хатыным Гөлнара да сыйлап кына тора, йомшак ягымны тиз сизеп алды.

Кырмыска торты дигәндә, исеме дә гаҗәп бит. Кырмыскаларны бик хөрмәт итәм. Карап торсаң, бер тәртипкә салынган система ул. Һәр кырмысканың үз роле, үз вазифасы бар. Тырыш хезмәтләре белән үзләренең көч икәнлекләрен күрсәтәләр. Коръән сүрәләрендә дә алар турында искә алына. Үзем дә әнә шул кырмыскалар кебек тынгысыз кешемен, гел чабып, эшләргә тырышам, гел нидер оештыру теләге белән яшим.

Кирәк: ике йомырка, 200 грамм сыер мае, ярты стакан шикәр комы, каз мае, бер кап көпшәкләгеч (разрыхлитель), өч стакан он. Крем өчен: бер ак, бер кара куертылган сөт (сгущенка).

Әзерләү: туглап, камыр басасы. Чеметеп алып, нәни шарчыклар ясыйсы һәм шуны табага тезәсе. Мичтә кызарып пешкәч, ике төрле куертылган сөтне кушып ясалган крем белән болгатасы (агач кашык белән!). Әзер тортны матур савытларга тезеп куясы гына кала!

кырмыска

Азат Нурмөхәммәтов

Комментарий язарга