КОВИД ПАНДЕМИЯСЕННӘН КОТЫЛУ ЮЛЫ БАРМЫ?

Республикада эпидемиологик хәл начарайган очракта мәҗбүри вакцинация кертелү ихтималы бар.

Кулланучылар хокукларын яклау һәм кеше иминлеге өлкәсендә күзәтчелек федераль хезмәтенең Татарстан идарәсе җитәкчесе Марина Патяшина шундый фикердә. Татарстанның Хөкүмәт йортында узган республика киңәшмәсендә бу хакта җитди сөйләшү булды. Киңәшмәне Татарстан Президенты Рөстәм Миңнеханов уздырды. Бу хакта Президентның матбугат хезмәте җиткерде.

Марина Патяшина хәбәр иткәнчә, республикада коронавирус белән авыручылар саны әлегә тотрыклы, әмма катлаулы булып кала бирә. Илнең 26 субъектында эпидемиологик хәлнең начараюы сагайта. “Без мониторинг үткәрүне дәвам итәбез һәм эпидемиологик хәлнең начараюы сигналларына игътибар белән карыйбыз”, – диде ул.

Массакүләм вакцинация 2021 елның гыйнварында башланды. Республикага барлыгы 548 мең вакцина килгән, 447 мең кешегә прививка ясалган.

Чыганак: Шәһри Казан