“Спелл батл” уенының яхшы яклары шактый

20 февраль Лев Толстой исемендәге филология һәм мәдәниятара багланышлар институтында чираттагы “Спелл батл” уены узды. Ул 21 февраль – Халыкара телләр көненә багышлап үткәрелде. Уенчылар – Кытайның Сиянь нефть институты студентлары. Алар ФһМБИда рус теле буенча стажировка үтәләр.

20180220_151647

“Спелл батл” – укый-яза белү дәрәҗәсен тикшерергә, сүзлек запасын баетырга, көндәлек тормышта сүзләрне урынлы кулланырга өйрәтүче уен. Аның төп максаты – туган тел белән берлектә, чит илләргә өйрәтү һәм әлеге телдә ирекле аралашу күнекмәләрен бирү.

20180220_151659

Уен тәртибе бик гади: һәр раундта икешәр катнашучы такта янына чыгып, үз көчен сыный. Бурыч – экспертлар тәкъдим иткән рус һәм инглиз сүзләренең һәр хәрефен дөрес итеп әйтеп чыгу. Бер турда җиңүче икенче турга үтеп, алга таба шул тәртиптә уенны дәвам итә. Иң көчлеләре ярымфинал һәм финалда көч сынаша. 34 катнашучыдан финалга бары тик ике уенчы гына килеп җитте. “Спелл батл” уены җиңүчесе исеменә Хун Мэнни (Маша) исемле студент кыз лаек булды. Ул конкурска ныклап әзерләнгән. “Артык авыр булмады. Чөнки һәрбер сүзне ятлап өйрәндем. Шуңа күрә җиңүче булдым”, — дип белдерде ул үз фикерен.

Җиңүче

Катнашучыларның исемнәре миндә кызыксыну тудырды. Аларны чын исемнәре белән түгел, ә рус исемнәре белән дәштеләр. Баксаң, мондый үзенчәлекне институт мөгаллимнәре уйлап тапкан икән. “Әлеге исемнәрне үзебез теләп куймадык. Ә укытучылар кытай теленә аваздаш итеп тәрҗемә иттеләр. Без моңа каршы түгел”, — ди алар.

20180220_164732

Уенчылар фикеренчә, алар яхшы әзерләнгәннәр. Әмма максталары җиңү түгел, ә үзләренең тел байлыгын арттыру, рус телендә камил сөйләшергә өйрәнү. Күпчелеге “Спелл батл”да беренче тапкыр гына үз көчен сыный икән. Җиңүче бер генә булуга карамастан, һәрберсе “Катнашучы диплом”ына ия булды. Үзләре әйткәнчә, уенны бик ошаттылар. Бер-берсе өчен чын күңелдән җан атып, көч биреп утырдылар. Әле рус телендә камил сөйләшмәсәләр дә, максатчан рәвештә өйрәнүләре, телгә багышланган уен-конкурсларда катнашулары мактауга лаек, минемчә.

 

Комментарий язарга