Бүгенге белән генә яшәмә…

“Сәлам, Регина! Хәлләрегез ничек? Әә, яхшы. Үтенечем бар иде. Баламны татар теленә өйрәтә алмассызмы?”…

Еш кына татар, ләкин татар телен камил, яхшы белмәгән, гомумән, шул телдә аралашмаган (мохит, мохит…) әниләрдән миңа шундый сораулар килеп тора.

“Син бит татар бүлегендә укыйсың, нәрсә булып бетер инде?” — дип тә сорап куйгалыйлар. Беренче тапкыр телебез тирәсендә килеп туган катлаулы вәзгыять килеп тугач, шаккаттым. Бу — минем туган телем бит! Мин Татарстанда, татар илендә (!!) яшим. Кайда мантыйк?..

“Татар теле кирәкми, ул миңа тормышта кирәк булмаячак!!” — дип, балалар, үзем кебек үк филолог ситудентлар әйткәнен ишетә башладым. Ишеттем. Хәзер булсаммы, матур итеп кенә шуларга бу фикернең ялгышлыгын дәлилләр идем! Менә кара:

  • ике телне беләсең, димәк син инде билингвист
  • син күп кенә кеше белән яхшы аралаша аласың, фикереңне җиткерә аласың
  • туган телеңне камил белү — зур байлык һәм горурлык
  • бүгенге белән генә яшәмә, киләчәктә бу сиңа кирәк булачак, кая ашыгып әллә ни әйтеп куясың әле?

…Май аенда соңгы кыңгырау бәйрәменә килдем. Шунда татар телендә җыр башланды. “Миңа татар теле кирәкми” дигән берәү, үзе дә сизмәстән, татарча кушылып җырлап җибәрә. Рәхәтләнеп елмаем куям. “Менә бит!”. Димәк, кирәк. Димәк, йөрәктә.

Мин ике телне кечкенәдән яхшы белүемә бик горурланам. Аннары аңа әле инглиз теле дә кушылып китте. Бөтенләй акыллы булдым бит ! Инде олырак сыйныфларда телләрне чагыштырып, охшаш я аермалы якларын үземчә бүлә башладым. КФУның татар филологиясе бүлегенә кергәч, үземнең бөтенләй бай икәнемне аңладым. Мин берничә тел беләм. Аларны шәп кенә куллана алам. Башка телләрне әйбәт кенә шул камил белгән телләр белән бәйләп аңлый, өйрәнә алам. Менә бит нинди байлык!

…Ләкин шул байлыкны танып белү туган телдән башлана!

IMG_1262

Комментарий язарга