Тукай каләме: 14 хикмәтле өзек

Эш турында

Тынма, эшлә, и сабый! Бел, Тәңредән эшләргә — көн,
Эшләп аргачтын, бирелгәндер тыныч йокларга төн.
«Эш» шигыреннән

И сабыйлар! Эшләгез сез, иң мөкаддәс нәрсә — эш,
Эш агачы һәрвакытта бик юмарт китер җимеш.
«Эшкә өндәү» шигыреннән

Яшьлегеңдә күп тырышсаң, эшкә бирсәң чын күңел,
Каршыларсың картлыгыңны бик тыныч һәм бик җиңел.
«Эшкә өндәү» шигыреннән

Дөньяны пакьли алмадым…

Кайтмады үч, бетте көч, сынды кылыч-шул булды эш:
Керләнеп беттем үзем, дөньяны пакьли алмадым…
«Кыйтга» шигыре

Керләнә өсте-өстенә рух, һич хозур вөҗданга юк;
Ни  сәбәптән Җир йөзендә тәнгә-мунча, җанга-юк?!

***

Ә шулаймы?— Акча барда бар да дуст шул, бар да яр;
Акча исе чыкмый торса, бар да яныңнан таяр!
«Теләнче» шигыреннән

Саулыгың — минем саулык

Васил Маликов. Тукай портреты

Васил Маликов. Тукай портреты

Бар уем кичен-көндезен сезнең хакта, милләтем;
Саулыгың – минем саулык, авыруың – минем авыруым.
«Милләткә»

Милләтне күтәрергә күңелем ашыга һәм ашкына;
Китмәсен күңелем очып, бастырып куй таш кына.
«Алла гыйшкы хакына»

Хайваннарга без охшамыйк…

Гыйлем белмәс хайваннарга без охшамыйк,
Тырышмактан, тырмашмактан һич бушамыйк…
«Дустларга бер сүз»

***
Өч наданга алышынмас-бер яза белгән кеше;
Мәгърифәт эстәр, иренмәс һич – кеше булган кеше…

***
Зур бәхетләр сызганып эшкә бирелгәннән килә…

***
Безнең гомер уен түгел, бәйрәм түгел,
Һич кайгысыз кеше булса — адәм түгел!

***
Мәгариф-хәяттыр. Мәгариф-хәяттыр. Мәгариф-хәяттыр. Һәр бәхетне, һәр сәгадәтне, һәр нәҗатны анчак голүм вә мәгърифәттән генә көтмәк кирәктер.

***
Чакырып яз укырга, уку кыйммәтен тәкъдир ит;
Аңлат наданлыкның начарлыгын, аңлат агу икәнен.
«И каләм!» шигыреннән

Ләйлә Исламова тупланмасы

http://giylem.tatar

Комментарий язарга