Зәринә Хәсәншина: «Җебеп торырга яратмыйм»

«Казан егетләре» белән «Ак чәчәкләр» җыры башкарганнан соң, җырчы Зәринә Хәсәншина тагын да танылып китте. Карап торышка бик җитди, усал кебек тоелса да, аралашканда Зәринәнең нечкә күңелле булуын аңлыйсың. Кыскача менә шулар, ә тулырак хәзер танышырсыз…

Кыскача белешмә:

                   Туган урыны: Балык Бистәсе, Тәберде Чаллы авылы;

                   Туган көне: 26 март 1995 ел;

                   Белеме: И. Әүхәдиев исемендәге Казан музыка училищесы, бүгенге көндә Н. Җиһанов исемендәге Казан дәүләт консерваториясендә белем ала;

                   Ярата: туры сүзле, төгәл булу;

                   Яратмый: икейөзлелек, кешегә яраклашу;

                   Инстаграмы: @zarinakhasanshina.

ЗАРИНА2

Зәринә, әниең – укытучы, әтиең хисапчы. Ә синдә җырга мәхәббәт кайдан барлыкка килде?

Җырга сәләт әниемнең әтисе – бабамнан килгән, диләр. Ул моңлы итеп җырлаган һәм көчле көрәшче дә булган. Мин җырласам, энем спорт белән мавыга, җәен туп типсә, кышын хоккей дип, шугалактан кайтып та керми. Бабамның сәләтләре икебезгә дә күчкән.

Ничә яшьтән җырлыйсың?

Үземне белә башлаганнан бирле. Балалар бакчасында һәр ел Кар кызы итеп куялар иде. Яңа ел җырларын яратып башкардым. Шуннан башланып китте кебек. Һәм чынга ашарлык хыялга, максатка әверелде.

Җырчы булыр өчен нинди сыйфатлар кирәк?

Үҗәтлек һәм сәләт.

Сәләтле булырга кирәклеген аңларга була. Ә җырчы кешегә үҗәтлек нигә?

Кеше арасына чыгар өчен. Җебеп торсаң, көндәшләр «таптап» китәргә дә күп сорап тормас.

Сәләт мөһимрәкме, әллә тырышлык та җитәме?

Иҗат өлкәсендә сәләтсез булмый, билгеле. Сәләт белән уңышка ирешү җиңелрәк. Ләкин тырышлык һәр эштә, һәрвакыт кирәк. Кеше җигелеп эшләгәндә, сәләтле кеше йоклап ятса, артта калуы да бар.

Җырчы һөнәрен сайламасаң, кем булыр идең?

Полиция хезмәткәре. Формалары матур. Аларның, җырчылар кебек, башка һөнәр ияләреннән аерылып торулары җәлеп итә.

Җырчы булып кына тормыш көтеп буламы соң?

Була. Менә яшибез бит әле. Әлбәттә, хатын-кызга бу өлкәдә күпкә авыррак, дип уйлыйм. Терәк булырлык, сине аңларлык тормыш иптәше табу җайсыз. Ә хатын-кыз өчен иң мөһиме шул.

Бу темага килеп кергәнбез икән инде, дәвам итик. Күптән түгел мәхәббәт турында «Син дия» дип аталган җырың дөнья күрде. Зәринә Хәсәншинаның йөрәген яулаучы бармы?

Сер булып калсын… (Елмая.)

Синең, гомумән, гашыйк булганың бармы?

Мин тиз гашыйк була торган кеше. Ләкин шулай ук тиз сүреләм дә. Әни миннән: «Шырпы кебек дөрләп янасың да, шундук сүнәсең», – дип көлә инде. Ләкин чын-чынлап яратканым бар, дип әйтә алам.

Сөйгән ярың нинди сыйфатларга ия булырга тиеш?

Әтиемә охшавын телим. Кырыс, үз сүзен әйтә торган. Хатын-кызны хөрмәт итсен.

Фотоларда, видеоларда сине «Казан егетләре» төркеме белән күрәбез. Синең аларга бәйлелегең нинди?

«Казан егетләре» белән 2013 елдан бирле эшлим. Алар белән концертлар куябыз, ел дәвамында гастрольләргә чыгабыз. Гомумән, аларның канаты астында, дисәм дә була. Мине «Татар моңы» конкурсында күреп, шылтыраттылар. Үзләре белән гастрольләргә йөрергә җырчы кыз эзләгәннәр икән. Беренче гастрольләрдә чын мәгънәсендә сынау уздым. Хәзер менә бишенче концертлар сезонына әзерләнәм. Мин аларга бик рәхмәтле!

IMG_7713

Араларында Айдар Әгъләмов исемле буйдак егет тә бар. Арагызда нинди мөнәсәбәтләр?

Яхшы дуслар. Кеше ни сөйләмәс, әмма без – коллегалар. Дистанцияне тота беләбез.

Үзеңә үрнәк итеп кемне куясың?

Беркемне дә үрнәк итеп алганым юк. Ләкин еш кына социаль челтәрләрдә уңышка ирешкән кешеләрне карап, үземә мотивация алам. Алар миңа тик торырга бирмиләр (көлә).

Җырларың белән тамашачыларны сөендереп торасың. Клибың да бар. Иҗатыңда тагын нинди яңалыклар көтәргә?

Яңа сезонда яна җырлар булачак. Араларында яңартылган ретро-җырлар да, төрле авторлар иҗат иткән өр-яңа әсәрләр дә бар. Ә көз ахырларында тагын бер клип төшерергә планлаштырам. Әлегә нинди җырга икәнен әйтмим – сер булсын.

Зәринәнең иң зур хыялына килсәк?

Хыялларым бик күп. Санап бетерә торган түгел. Ләкин аларның һәрберсен чынга ашырып барам.

Син бүген консерваториядә белем аласың. Уку авырмы?

Авыр… Консерваториядә без классик әсәрләр башкарабыз. Тавышым – лирик сопрано, ләкин эстрадада алай җырламыйм, чөнки тамашачыларның бер-икесе генә сине мөкиббән китеп тыңлаячак, ә күпчелек өнәп бетерми. Классиканың югары музыка икәнен һәркем аңлыйдыр. Шуңа күрә быелгы концерт программасына, берне генә булса да, чит ил классик әсәрен кертергә ниятлим.

Һөнәрең буенча кем булачаксың?

Җыр укытучысы, җырчы, мәдәният хезмәткәре.

Димәк, Зәринә Хәсәншина укытучы булып китәргә дә мөмкин?

Бик мөмкин. Балаларны яратам, укытырга сәләтем дә бар дип саныйм.

Егерме елдан соң Зәринә Хәсәншинаны сурәтлә әле…

Ул вакытта Хәсәншина булмам дип өметләнәм (көлә). Илле яшен кырлаган җырчы Зәринә шундый ук гади булып калыр ул. Әлбәттә, барысын да белеп бетереп булмый, иң мөһиме, исәнлек диләрме әле?

IMG_7858

Зәринә Хәсәншина белән шәхсән таныш булмаганнар өчен әйтәм: җырлавы ничек сокландыргыч булса, күңеле дә шундый ук: тыйнаклыгы, эчкерсезлеге белән ул күпләрне таң калдырыр иде… Шундый булып кал һәм җиһанга яктылык өләш, Зәринә!

Комментарий язарга