БЫЕЛГЫ КЫШ (Рөстәм Мингалим шигыре)

, архИдел, №1, 2001 ел

Үрелеп кенә Үргә ак юл менә,

күптән киткән идем шул юлдан.

Читтә каршыладым картлыгымны,

шуңа күнеп яшим быел да...

Онытыла язган Үр* һәм ак юл,

оныттыра икән бу тормыш?!

Быелгы кыш - миңа таныш түгел,

мин белмәгән сәер-якты кыш!

Мондый кышны әллә күрдемме бер,

килгәнме ул минем яшьлектән?

Үз хәлемне аңлый алмыйм быел,

аңлый алмыйм әле ничек тә...

Һаман чыгып карыйм, кышны карыйм:

офыккача якты тирә-юнь.

Кар кырлары аша йөзеп бара

яшьлегемә таба йөрәгем...

Ак каз барса шулай, таныр идем,

йөрәк димәс идем ялгыш та.

... Туган якта кабер эчләре дә

яктыргандыр сыман бу кышта.