ИКЕ ИКЕҢ ДҮРТ ТҮГЕЛ (Әхмәт Рәшит шигырьләре)

«Идел», № 3, 1996

Татарстанның атказанган сәнгать эшлеклесе Әхмәт Рәшитнең йөрәге тибүдән туктады...

Гомер буе озата барган яшьлек хиссияте... Унҗидедәге - алтмышта.

И шагыйрь тормышы, чәчләргә чал кергәндә дә - яшь. Күзләрдә - яшь.

***

Яшь кызларның тыңлыйм гыйшык җырын,

Тик берсе дә тартмый күңелемне;

Әллә инде егет булмас борын

Йөрәгемдә ялкын сүрелдеме?

Шушы яшькә җитеп бары бер кат

Бармы әле аның кабынганы?

Юк, сөймәдем беркемне дә чынлап,

Беркемне дә өзелеп сагынмадым.

Юк, мин белмим гашыйк егет төсле

Кызлар өчен акылым җуйганымны.

Ә син, кызый, сиңа булган хисне

Әллә чыннан диеп уйладыңмы?

Тик мин беләм: чал картлыкта бәлки

Йөрәгемә кемдер ут кабызыр;

Бәхет бирер гыйшкы аның балкып,

Рәхәт бирер миңа аның назы.

1958

***

Чәчне пәке белән кырдыргач...

Татар башы чокыр-чакыр,

Чокыр булса да такыр.

Шаян җыр

Минем башта кемнең ни эше бар -

Чокыр-чакырмы ул, такырмы?

Һич ким түгел ләкин анда акыл,

Һич ким түгел җорлык, тапкырлык.

Кибән кебек чәчкә яшерергә

Кибәк түгел аның эчләре,

Тау елгасы сыман кайный уем,

Аргамактай ыргый хисләрем.

Мин кемнәрдер кебек стандарт түгел -

Үзгә булган җисми калыбым;

Шома түгел тәти егетләрдәй -

Кайбер кануннарны танымыйм.

Төртеп, калкып торган җирләрем күп,

Чәнечкем һәм шырпым җитәрлек,

парик кимим ләкин,

Грим салмыйм -

Табигать!

Мин синең үзең күк.

Гади...

Буйларым да...

Уйларым да...

Эшне исәп белән башламыйм;

Кызык өчен генә

Менә чәчне

Пәке белән кырып ташладым.

Тиргәүчеләр

Көлүчеләр булды:

"Кайчан әле

                 эләктең

                              тегендә...

Хи-хи-хи!..

Бигрәк килбәтсез..." - дип

Күчерделәр гайбәт теленә.

Минем башта кемнең ни эше бар.

Үз башым ич -

Чәчме,

Такырмы.

Аргамактай җитез барыбер уем,

Идел сыман салмак акылым.