МӘХӘББӘТНАМӘ (Фәиз Зөлкарнәй шигырьләре)

"Идел", 2006, декабрь.

Төсләр кирәк түгел иде миңа

Тик сине күргәч,

зәңгәр серен эчәргә теләдем

күзләреңнән

исергәнче.

Алсулыгын татырга теләдем

пешкән иреннәрең чиясеннән.

Сыйпап карыйсым килде

төн сулышыдай каралыгын

чәчләреңнең.

Карашыма наз булыр, дидем,

гөлнекедәй тәнең

аклыгы.

Һәм теләмәсәм дә -

нәрсә эшлим! -

сарыга сабыштым, сарыга...

Төсләр кирәк түгел иде миңа...