Нигә йөзем хәләл дә, хәмер – хәрам?

Берәүне мөселманнарның йөзем яки виноград ашаулары, әмма шушы җимештән ясалган хәмерне хәрам санаулары гаҗәпләндерә. Шуңа ул бер мөселман галименә мөрәҗәгать итеп:
- Сез ни өчен йөзем ашыйсыз да, шул ук йөзем суы булган хәмерне эчмисез? – ди.
- Менә бу суны күрәсеңме? Әгәр мин синең башыңа шул суны бераз сипсәм, авыртырмы? – ди мөселман. 
- Юк, - ди теге кеше.
- Менә бу комны күрәсеңме? Әгәр шул комны башыңа сипсәм, авыртырмы? 
Теге кеше тагын:
- Юк, - дип җавап биргәч, мөселман: 
- Әгәр шушы ком белән суны кушып бутасам һәм бер йомарлам ясап, аны берничә көн киптергәннән соң, шуны башыңа атсам, авыртырмы? – ди. 
- У-у-у... минем башым ярылыр иде, - ди теге кеше.
- Йөзем дә шул рәвешле су белән кушып әчеткәч... кешенең акылына да, малына да, үзенә дә зыян сала, - дип, мөселман яһүдне сүзсез калдыра. – Аллаһ адәм баласына бер нәрсәне дә хәрам кылмады, мәгәр аңа зыяны булырдай нәрсәләрне генә хәрам кылды. Аллаһ безне, инсаннарын ярата һәм безгә дөньяда да, ахирәттә дә яхшылык тели.