ҖАНИСӘП ТУРЫНДА СӨЙЛӘШИК – 3

Илкүләм конкурста катнашып, бүләк отыгыз!

Випин чебие

Бөтенрусия халык санын алу кампаниясенә әзерлекнең күңелле моментлары да бар. Җанисәпнең рәсми сайты, мәсәлән, балалар өчен берничә конкурс үткәрде. Хәзерге вакытта да иҗади конкурс бара.  Конкурс шарты гади: дәүләт әһәмиятенә ия вакыйганы – җанисәпне – ничек күз алдына китергәнен бала рәсем белән “әйтеп” бирергә тиеш.

Бәйге ике 7-9 һәм 10-12 яшьлек балалар арасында аерым уздырыла. Һәрбер яшь категориясендәге икешәр җиңүчегә 25әр мең сумлык акчалата бүләк биреләчәк. Оештыручылар рәсем техникасын һәм балалар фантазиясен чикләми: карандаш, фломастер, буяу белән сурәтләргә мөмкин. Төп шарт: рәсемнәрдә җанисәп-2021нең рәсми логотипларыннан икесенең берсе (алар сайтта бар) яки талисманы – Випин чебие дә булырга тиеш! Бердән алып өчкә хәтле  рәсем була ала. Аларны фотога төшереп, баланың үзенең яки әти-әнисенең, башка якыннарының инстаграм аккаунтына элеп куярга кирәк. Кагыйдә буенча, рәсем авторы конкурста берәр тәхәллүс белән катнаша.

Рәсемнәр @strana2020 актив сылтамасы астында #ярисуюперепись хэштегы белән урнаштырыла. Аннары www.strana2020.ru сайтында теркәлеп, катнашучылар өчен форманы тутырырга, сылтаманы күрсәтергә кирәк. Билгеле, бөтен бала да моны мөстәкыйль башкара алмас. Өлкәннәр балаларга шундый мәртәбәле конкурста катнашып, бүләк отарга булышыгыз!

Кагыйдәләр белән тулырак итеп https://www.strana2020.ru/contest/drawing/vpn2020-drawing-contest-regulation-final-v2.pdf  сылтамасы буенча таныша аласыз.

Конкурсның этаплары:

1. 2020 елның 16 ноябре – 2021 елның 1 марты – гаризалар бирү.
2. 2021 елның 3-15 марты – сайтта рәсемнәр өчен тавыш бирү.
3. 2021 елның 31 марты – җиңүчеләрне игълан итү.

Хөрмәтле милләттәшләр, бу конкурста активрак булыгыз! Безнең никадәр күпсанлы һәм бердәм икәнебезне бөтен ил күрсен әле!

Сораулагыгыз калса, оештыручылар белән элемтәгә керергә мөмкин: risunok@strana2020.ru.