Без (Эльнар Байназаров)

Күперсез, көймәсез утраулар.
Арада мең диңгез, бер яра.
Талчыккан күзләремә, зинһар,
Утравыңнан ялгыш бер кара...

Утравыңа яңгыр коядыр,
Куышыңа шакый тамчысы.
Шешәдәге хатка: «Каядыр»,
«Кемгәдер» дип адрес куясың...

Диңгезләр давылсыз. Җил тыныч.
Утраулар да түгел бик ерак.
Нигә соң һаман юк бәйләнеш?
– Күперсез, – дисең син, – җайлырак...

Арада диңгезләр булганда,
Булганда арада мең упкын.
Чынлыктагы түгел, син миңа
Ерактагы килеш якын...

Эльнар Байназаров