ЧӘЧ ҮСТЕРҮ СЕРЛӘРЕ

   Ә сез беләсезме, Кытайның Хуангло авылына туристлар нәрсә өчен агылалар? Биредә бөтен хатын- кызларның да чәчләре икешәр метр озынлыкта икән, димәк, туристлар да чәч үстерү максатыннан әлеге авылга киләләр. Бу кызыклы фактны "Өмет" газетасы сайты аша белдек.

Озак вакытлар хатын-кызларның чәчләрен үз якыннарыннан башка кемгәдер күрү тыелган. Кем дә булса берәү бу авыл хатын-кызларының чәчен күрсә, аны шул гаиләгә кол итеп 3 ел эшләткәннәр.

1980 елларда бу тыюлар бетерелгән һәм монда туристлар шул икешәр метр озынлыктагы, чем-кара һәм картайганда да агармый торган чәчләрне күрү өчен килә.

Хатын-кызлар туристлар алдында чәчләрен туздырып бии һәм акча эшли. Аена 300 доллар чамасы акча җыела. Хәерче авыл өчен бу бердәнбер керем чыганагы булып тора. Авылда 400гә якын кеше яши.

Монда кызлар шампунь кулланмыйлар икән. Алар борынгыдан калган гадәт буенча, чәчне дөге пешкәннән соң калган су белән юалар. Сере гади: дөге пешкәннән соң калган суны бүлмә температурасында тәүлек буе ачыталар. Аны тагын бер тапкыр кайнатып чыгарып,  берничә тамчы эфир мае тамызалар һәм шуның белән чәчне юалар.