ИЛШАТ РӘХИМБАЙ ТАТАР ГӨНАҺЛАРЫ ТЕМАСЫНА СӨЙЛӘШЕРГӘ ОМТЫЛА

Илшат Рәхимбайның «Гаилә» дип аталган беренче видео «Инстаграм» битендә 24 мең тапкырдан артык каралган. «Татар гөнаһлары» видеороликлар циклына шулай ук «Мирас» һәм «Моң» дигән видеолар да кергән.

Илшат Казан федераль университетын тәмамлаган. Ул  татар теленең, мәдәниятенең һәм милләт буларак татарларның киләчәге темасына видеороликлар төшерүче режиссер, сценарийлар авторы һәм продюсер.

Автор сүзләренчә, аның эшләре – теге яки бу дәрәҗәдә һәр кешедә булган «татарлык», татар гөнаһлары темасына сөйләшергә омтылу.

Режиссер билгеләп үткәнчә, кеше белән җитди темаларга позитив кына түгел, негатив аша да әңгәмә корып була. Аның видеороликлары - «кешене чынбарлыкка кайтару максаты белән яңакка сугуның җиңел формасы. Нәкъ менә шул чагында кешедә хис-кичерешләр уяна, ул үткәннәрне искә төшерә һәм уйлана».

Илшат видеолар хакында фикер алышу һәм аларга бирелгән бәяне үз иҗат җимешләренең төп нәтиҗәсе дип саный. 

Бу хакта югары уку йортының матбугат хезмәте хәбәр итә.

Шулай ук укыгыз: ИЛШАТ РӘХИМБАЙДАН 25 СӘЕР СОРАУГА 25 СӘЕР ҖАВАП