Исерек 3 кешенең гомерен өзгән

Уфада  исерек авария нәтиҗәсендә  3 кеше  гомерен өзгән уфалыны хөкем итәләр. 39 яшьлек ир  “Исерек килеш юл хәрәкәте кагыйдәләрен бозу нәтиҗәсендә саксызлык белән 3 кеше гомерен өзү һәм авария урынын ташлап китү аркасында кеше сәламәтлегенә авыр зыян салу” һәм “Кабаттан исерек килеш автомобиль белән идарә итү” маддәләре буенча гаепләнә.

Хәтерегезгә төшерәбез, узган елның 13 августында моңа кадәр исерек килеш руль артына утырганы өчен водитель таныклыгыннан  мәхрүм ителгән ир, исерек килеш «TOYOTA LAND CRUISER 200» автомобилендә юл һәлакәте оештырган иде.

Софья Перовская урамыннан хәрәкәт иткәндә,  ул, Кавказская урамындагы киселешкә барып җитмәстән каршы як юл полосасына чыга, светофорның кызыл төсенә киселешне уза һәм   «ВАЗ 21093», «RENAULT KAPTUR», «AUDI A6» автомобильләре белән бәрелешә. Беренче бәрелешүдән соң водитель туктамый, ахырда «Hyundai Santa Fe»га барып менә.

Авария нәтиҗәсендә “девятка” водителе һәм аның ике пассажиры һәлак булды, тагы берсе җитди имгәнүләр алуы билгеле булды.

Исерек водитель гаебен таныды. Җинаять эше Уфаның Киров районы судына юнәлтелде, дип хәбәр итәләр БР Прокуратурасында.

чыганак: "Өмет"