Казан яшь дипломатлар һәм эшмәкәрләрне очраштыра

19-22 май көннәрендә Казанда Ислам хезмәттәшлеге оешмасына (рус. ОИС) керүче илләрнең яшь дипломатлары форумы уза. Ул быел алтынчы мәртәбә XIII Халыкара “Россия – Ислам дөньясы: KazanSummit 2022” саммиты кысаларында оештырыла. Форумда 35 делегат катнашуы көтелә.

Алты ел эчендә форумда дөньяның 35 иленнән (Ислам хезмәттәшлеге оешмасы регионы) якынча 160 яшь дипломат катнашкан. Куркынычсызлыкның бүлемсез булуы проблемасы, халыкара хезмәттәшлекне үстерүдә Татарстанның әһәмияте һ.б. – быелгы форумның төп темалары шундый. Форум нәтиҗәләре буенча дипломатия нигезләре буенча видеодәресләр булдырылачак. Чараның төп максатларының берсе - яшь дипломатлар арасында формаль булмаган элемтәләр кору. 

“Алдан таныш булган кешеләр белән хезмәттәшлек итү күпкә җиңел һәм рәхәт. Алардан нәрсә көтәргә, теге яисә бу вазгыятьтә үзтотышлары нинди һ.б. - формаль булмаган элемтәләр кору шуның өчен кирәк тә инде. Таныш булмаган партнерлар белән эш алып бару исә күбрәк көч таләп итә. Дипломатия актив, “тере” сөйләшүләр алып баруны күз уңында тота. Дипломатны табиб һөнәре белән чагыштырырга мөмкин. Алты ел укып кына чын табиб дәрәҗәсенә җитә алмаган төсле, дипломатларга да, илен тәкъдим итү өчен, югары уку йортын тәмамлау гына җитми. Моның өчен ким дигәндә 20-25 ел таләп ителә. Әлеге форум сыман мәйданчыклар яңа формаль булмаган элемтәләр булдырырга ярдәм итә”, - ди Чит ил эшләре министрлыгының Яшь дипломатлар советы рәисе Константин Колпаков.

Саммит кысаларында уза торган тагын бер мөһим чараларның берсе – Яшь эшмәкәрләр форумының бер этабы. Әлеге форумның онлайн программасы 10 апрельдән алып 18 майга кадәр узды, аның нәтиҗәсендә 35 иң яхшы стартап сайлап алынган. Алар иртәгә, 20 май көнне, проектларын экспертларга тәкъдим итәчәк.

Мисал өчен, былтыргы җиңүчеләр арасында CricFlex проекты булган (авторы - Габдулла Әхмәт, Пакистан). Ул крикет уены өчен датчиклар белән тәэмин ителгән махсус җиң булдырудан гыйбарәт. Җиң уен барышын “күзәтә”, кагыйдәләргә туры килмәгән хәрәкәтләрне билгели һәм нәтиҗәләрне телефонда күрсәтә. Проектына 7 мең доллар җәлеп иткән Габдулла Әхмәт крикет уенын камилләштерү һәм популярлыгын арттыруны максат итеп куйган.