Казанда “УМНИК” финалистларын билгелиләр: ярты миллионга кемнәр лаек булыр?

Быел “УМНИК” инновацион проектлар конкурсына барлыгы 134 гариза килгән. Финалга узган 72 катнашучы өч көн дәвамында проектларын экспертлы жюрига тәкъдим итте. Проектлар презентациясе Татарстан Республикасы Эшкуарлыкка ярдәм итү фонды мәйданчыгында узды.

Проектлар алты юнәлеш буенча кабул ителгән. Болар – цифрлы технологияләр, медицина һәм сәламәтлек технологияләре, яңа материаллар һәм химик технологияләр, яңа җайланмалар һәм интеллектуаль җитештерү технологияләре, биотехнологияләр һәм ресурсларны саклый торган энергетика.

Бәяләүнең төп критерие – проектны коммерцияләштерү, ди оештыручылар. Шуңа жюри арасында эшкуарлык берләшмәсе вәкилләре дә бар иде. Алар проектларга продуктка булган сорау, конкурентлы өстенлекләре һәм импортны алмаштыру күзлегеннән бәя бирде. Алга таба региональ жюри проектлар арасыннан егерме иң яхшы эшне сайлап, аларны Инновацияләргә ярдәм итү фондына тәкъдим итәчәк. Җиңүчеләр исемлеге быел билгеле булачак.

Мисал өчен, эшләр арасында үсемлек чималын киптерү өчен үтә югары ешлыктагы җайланма булдыру проекты бар иде. Проект авторы, яшь галимә Адилә Шагеева сүзләренчә, әлеге җайланма үсемлекләрне үсү шартларында ук киптерергә мөмкинлек бирәчәк (җайланма мобиль үзлеккә ия). Бу вакытта чималда гөмбәчекләр хасил булмый, ягъни чимал бозылмый, шулай ук, дару үләннәре мисалында, чималның файдалы үзлекләре дә саклана төшә.   

Җиңгән очракта, һәр проект 500 мең күләмендә финанс ярдәм алачак. Грант бер елга тапшырыла. Конкурсның приз фонды 10 миллион сум тәшкил итә.

Конкурс турында тулырак: УМНИК