ӘХСӘН БАЯН: "Хатын-кызга “акылсыз” дисәң, ул сиңа ачуланмаска да мөмкин".

Танылган әдипләребезнең хатын-кызлар турында фикерләре

Хатын-кызга “акылсыз” дисәң, ул сиңа ачуланмаска да мөмкин. Ләкин “ямьсез” дисәң, ул сине ахыр көненәчә гафу итмәчәк.

Әхсән Баян

Кызлар матурлыгы – пропуск, ачылмас ишекләрне ачтыра!

Шәүкәт Галиев

Хатын-кыз шулай ул: башта кочакка иңә, аннары өйгә керә, ахыр ир белән идарә итә башлый.

Мөсәгыйт Хәбибуллин

Кыз йөрәге күбәләк канаты белән бер. Сыңар шырпыдан да дөрт итеп кабына да дөрләп китә.

Аяз Гыйләҗев

Хатын-кызларның милләтен мин кайсы халыкка бала табып бирүенә карап билгелим.

Туфан Миңнуллин

Хатын-кызда кемнедер назларга, җылытырга омтылыш хисе көчле. Шушы хис җылыга сусаган җаннарны бик тиз яулап ала.

Фәнис Яруллин

Хатын-кызның үзеңә мәхәббәтен уңай, кирәкле якка үзгәртәсең килсә, баласын макта.

Тәлгат Галиуллин

Хатын-кыз ямьсез булалмый.

Хатын-кыз чибәр була!

Роберт Миңнуллин

Хатын-кызның иң матуры - үз җитешсезлеген яшерә белгәндә.

Газинур Морат