“Кышкы романс” җыры – Яңа дулкын каналында!

Иделнең “Яңа дулкын” проектында Татарстанның атказанган җырчысы Айрат Ганиев “Кышкы романс” җырын башкарды. “Кышкы романс” җырын халык арасында “Син гомер агышларым” дип тә атап йөртәләр. Башта бу әсәрнең көе языла.

Аннары гына Рим Хәсәнов көенә Наҗар Нәҗми сүзләр иҗат итә. Шунысы да кызыклы бу җырны Рим Хәсәнов армиядә хезмәт иткәндә  язган. Халык арасында зур популярлык казанган җырны Айрат Ганиев заманча төсмерләр кертеп башкара. 

-    “Кышкы романс” әсәрен бала чагымннан ук ишетеп үстем. Әлеге җырны әнием дә ярата иде... Күптән язылган әсәр булса да, без яшьләрне дә дулкынландыра. Көе дә, сүзләре дә искиткеч. Минем иң зур хыялларымнан берсе – әлеге җыр музыкасының авторы Рим Хәсәнов белән якыннан танышу, - ди Айрат Ганиев. 
Танылган композитор, бик күп популяр җырлар авторы, Татарстан Республикасының Г. Тукай исемендәге дәүләт премиясе лауреаты Рим Хәсәновны белмәгән кеше юк. Аның татар җыр сәнгате үсешенә керткән хезмәте бәяләп бетергесез.  Әлеге җыр тарихы турында фикерләре  татар матбугатында да дөнья күргән иде. 
  
“Наҗар Нәҗми пьесасы буенча язылган “Күршеләрдә кунак” спектакленең премьерасыннан соң бөтен труппа Актерлар йортында җыелды, - дип яза ул үзенең истәлекләрендә. - Автор артистларны, спектакльне сәхнәгә куючыларны кичке аш белән сыйлады.Әлеге спектакльдәге бер җырны башкарганнан соң, ул миннән берәр яңа җыр җырлавымны сорады. Ул вакытта мин солдат идем, шәһәргә “увольнительный” белән чыккан вакыт. Хәрби бүлектә төнге каравылда алышынгач, клубка киттем, җиргә төшкән кар бөртекләренә карый-карый пианинода уйнап җибәрдем. “Кышкы романс” җыры шулай туды. Нәкъ шушы җырны Наҗар Нәҗмигә җырлап күрсәттем дә инде. Шагыйрь икенче көнгә очрашу билгеләде. Икенче көнне ул җырымның үзенә бик ошаганын әйтте. Наҗар Нәҗми әзер көйгә җыр тексты язарга теләге барлыгын әйтте.

Без ул вакытта Наҗар ага белән бик озак утырдык, ул ритмны саклау өчен минем эшләнмәләрем – русча текстымны алып китте.
Дөресен генә әйткәндә, безнең булачак җырыбызның уңыш китерәчәгенә ышанмаган идем мин. Ләкин, берничә көннән Наҗар Нәҗминең шигырен укыгач, тәнемнән ток узган кебек булды. Бу гениаль шигырь иде! Наҗар Нәҗми белән актерлар йортына киттек һәм мин үзебезнең яңа гына язылган “Син гомер агышларым” җырын ун мәртәбә җырладым. Шагыйрь дә миңа кушылып җырлады, нәтиҗә белән бик кәнәгать булуы сизелеп тора иде. Соңыннан Наҗар Нәҗми, язып тутырылган өч мәктәп дәфтәрен күрсәтеп, мине янә бер кат гаҗәпләндерде. Болар безнең яңа җырның каралама вариантлары иде ...”