Пермьдә торба шартлап, кайнар суга пешкәннәр

20 гыйнварда төнлә Пермь шәһәренең индустриаль районында гадәттән тыш хәл булган. Бу хакта «Комсомольская правда» газетасы сайты яза. Совет Армиясе урамы, 21 адресы буенча урнашкан «Карамель» шәхси кунакханәсендә җирле вакыт белән 1.45 сәгатьтә коммуналь авария булу турында хәбәр ителә. Җылыту торбасы шартлау сәбәпле, кайнар су мини-отель биналарына тула. Әлеге вакыйгага шаһит булучылар кайнар суның бина эченә сыймыйча, ишектән ургып агуын сөйли.

Кунакханә подвал бинасында урнашкан, запас чыгу юлы юк. Аянычлы вакыйга булган көнне кайнар су кешеләрнең өстенә аккан, качып котылу берничек тә мөмкин булмаган. Нәтиҗәдә клиентлар кайнап торган суга тереләй пешеп үлгән.

Вакыйга булган урынга шәһәрнең барлык оператив хезмәтләре чакырылган. Коткаручылар бинадан биш кешенең үле гәүдәсен табып, шулар арасында бер бала булуы да ачыкланган.

Хәзер бина ике яктан да койма белән әйләндереп алынган. Коткаручылар суны япканнар һәм вакытлыча эшне туктатып торганнар. Коммуналь авария нәтиҗәсендә кунакханәдә булган тагын алты кеше пешкән, өчесе төрле тән җәрәхәте алу сәбәпле, хастаханәгә озатылган.

Соңрак ачыкланганча, су торбасы ике урыннан өзелгән булган. Су шулкадәр күп булган, ул кунакханә бусагасы аша урамга да аккан. Нәтиҗәдә күрше урамны да су баса башлаган, куе томан барлыкка килгән.

Прокуратура бәхетсезлек очрагы факты буенча тикшерү үткәрә башлаган.

— Җылылык челтәрләрен һәм торак йортны җылыту чорына әзерләү процессында катнашучыларның барлык гамәлләренә, шулай ук әлеге объектның һәм гражданнарны урнаштыру законлылыгына хокукый бәя биреләчәк, — диелә хәбәрдә.

Хәзерге вакытта кунакханәдә яшәүчеләрнең үлем факты буенча «кулланучыларның тормыш куркынычсызлыгы һәм сәламәтлегенә туры килми торган хезмәтләр күрсәтү» маддәсе буенча җинаять эше кузгатылган.

Чыганак: Интертат.ру