Рафаэль Сәхәбиевның 70 еллыгына - "Летучая мышь"

Бүген М.Җәлил исемендәге Татар академия дәүләт опера һәм балет театры сәхнәсендә И.Штраусның “Летучая мышь” спектакле уйнала. Анда Россия атказанган артисткасы Елена Ионова һәм “Мәскәү опереттасы” театрының танылган солистлары катнаша.

Спектакль Татарстанның Халык рәссамы, театрның элеккеге солисты Рафаэль Сәхәбиевның 70 еллыгына багышланган.

Рафаэль Сәхәбиев еш кына радио һәм телевидениедә чыгыш ясый, татар композиторлары Р.Яхин, Н.Җиһанов, С. Садыкова һ. б. җырларны һәм романсларны беренче башкаручы була. Казан консерваториясе студенты буларак Рафаэль Сәхәбиев Татар опера һәм балет театрының стажер төркеменә кабул ителә. Аның театрда беренче җитди эше Р.Гобәйдуллинның «Җиһангир» операсында Ислам роле була (1976). Бу партиядән соң артистның профессиональ опера карьерасы башлана, анда сәхнәгә куючылар артистның тавышын гына түгел, зур актерлык талантын да бәялиләр. Театрда эшләү дәверендә Сәхәбиев классик һәм милли репертуар операларында һәм оперетталарында утыздан артык роль башкара.