Саунада ундүрт яшьлек кызны көчләгәннәр

Казанда 22 яшьлек егетне «балигъ булмаган балага карата сексуаль характердагы гамәлләр» һәм «балигъ булмаган баланы көчләү» маддәләре буенча гаеплиләр. Бу турыда «Татар-информ» агентлыгына Россия Тикшерү комитетының Татарстан буенча Тикшерү идарәсе җитәкчесенең өлкән ярдәмчесе Андрей Шептицкий хәбәр иткән.

Тикшерү версиясе буенча, былтыр декабрь урталарында 22 яшьлек егет һәм аның иптәше мунчага җыена. Алар үзләре белән бергә ундүрт яшьтәге өч кыз баланы да чакыра. Табын корып утырганда егет кызларның берсенә аракы эчертә, аннары көчли.

Кыз бала бу турыда иптәшенә сөйли, соңрак баланың әти-әнисе дә бу хәлне белеп ала. Алар полициягә мөрәҗәгать итә.

Көчләүдә гаепләнүче егетне тоткарлыйлар. Аңа көчләү һәм балигъ булмаган балага карата сексуаль характердагы гамәлләрдә гаепләү белдерелгән. Тикшерү вакытында ул СИЗОда утыра.

Фото: https://pixabay.com/