Әтнә театры Кыргызстанның дүрт шәһәрендә татарча концерт куйган

Габдулла Тукай исемендәге Әтнә татар дәүләт драма театры коллективы 10-17 октябрь көннәрендә Кыргызстанда иҗади сәфәрдә булып кайтты. Бишкәк, Каракол, Жалал абад, Ош шәһәрләрендә милләттәшләребезгә театр коллективы милли концерт тәкъдим итте. 
 

«Безнең иҗади сәфәребез Идел буе Болгар дәүләтендә Ислам динен кабул ителүнең 1100 еллыгы уңаеннан Татарстан Президенты Рөстәм Миңнеханов йөкләмәсе белән оештырылды. Тамашачы безнең концертның Каракол шәһәрендә беренче татар концерты булуын әйтте. Җәләлабадта соңгы татар концертын 17 ел элек Башкортстаннан килеп куйганнар дип хәтерлиләр», - диде театр директоры Ленур Зәйнуллин. 

Әтнә театры Кыргызстанда яшәүче татарлар өчен махсус концерт программасы төзегән. Ул үз эченә халык җырларын, театральләштергән биюләрне һәм махсус язылган шигырьләрне алган. Сценарий авторы һәм алып баручы – театрның маркетинг буенча директор урынбасары, шагыйрә Гөлүсә Батталова.

«Кыргызстанда нинди татарлар яшәвен - аларның нинди тамырлардан, нинди нәселдән булуларын өйрәндем. Алар Патша Россиясе белән Ефәк юлын бәйләүче татар сәүдәгәрләре нәселе. Анда искиткеч халык яши», – диде Гөлүсә Батталова. 

Бишкәктән кала, бүтән Кыргызстан шәһәрләрендә дистә еллар татар концерт-спектакльләре куелмаган булган. Шуңа күрә дә милләттәшләребез милли моңнарга нык сусаган булуын да ассызыкладылар. 

«Концертыбызга төрле яшьтәге тамашачы килгән иде. Һәр шәһәрнең тамашачысы үзенчә. Барысы да бик җылы кабул итте. Бик күп чәчәкләр бүләк иттеләр. Минем эшләү дәверендә ул кадәр чәчәк алганым булмагандыр», - диде театр актрисасы Рәзилә Шәрифуллина.