ТӨЛКЕЛӘРГӘ ИСЕМ КУШТЫК!

Хәтерләсәгез, Казанның «Замбези елгасы» зоопаркында яшәүче зур колаклы төлкеләргә исем сайлаган идек.

Аларны Зэмба һәм Фарей дип атадылар. Исемнәрне сайларга янут ярдәм иткән, дип хәбәр итте kzn.ru.

Конкурс шартлары буенча, исемдә Африка мотивлары булырга тиеш иде. Финалга өч исем чыкты, дүртенчесен зоопарк хезмәткәрләре үзләре тәкъдим итте. Конкурска нәтиҗә ясау өчен зоопарк хезмәткәрләре бәйсез эксперт янут Беллага мөрәҗәгать иткән.

Янут алдына исем вариантлары булган дүрт кәгазьне куйганнар, һәр биткә банан кисәге салганнар. Белла Зэмба (ышаныч дигәнне аңлата) һәм Фарей (шатлык дигәнне аңлата) вариантларын сайлап алган.