Зебраларга көн бетә

Блогер Ләйлә Лерон Казан шәһәренең Бауман урамындагы зебра, ишәк киемнәреннән йөрүче акча талаучылар төркеменә каршы чыкты. Бу хакта ул үзенең инстаграм аккаунтында хәбәр итә. 

“Шәһәребездә туристларның саны чиксез. Күбесе гаиләләре белән ял итәргә килгән, кәефләнеп алганнары да шактый. Яңа ел бит. Әлбәттә, Казанны күрергә килгән кеше кая юл тота? Бауман урамына! Менә анда аларны зебра, ат, ишәк киемнәреннән “яңа геройларыбыз” көтеп тора да инде...”
Блогер язуынча, акча талаучылар туристларны җәлеп итү ысулларын яхшы белә. Алар белән төшкән мәзәк фотоларның берсе 100 сум тирәсе. Шул рәвешле, туристлар 1000 сумга кадәр акча калдырып китәргә мәҗбүр. “Алдап-йолдап, кунакларның кәефләрен төшерү, Казан турында шундый ямьсез истәлекләр калдыру да булдымы эш? Иптәш җитәкчеләр!!! Бер секунд игътибар! Бауман урамындагы бу галәмәтне үз күзләрегез белән килеп күрегез! Казаныбыз өчен безгә оят! – дип яза ул үз сәхифәсендә. – Шунысын да сорыйсы килә: ә нигә зебра белән ишәк? Үзебезнең татар шигырьләрен сөйләп, җырлар җырлаган геройлар кайда? Менә алар янына фотога төшүне сорап, туристлар үзләре килер иде. Урам артистларын һәрчак яклыйбыз. Әмма хәзерге кебек һәркемнән акча талап торган эшсезләрне генә түгел... Россиядә коронавирус дигән булалар тагын. Ә бу ишәк, зебра костюмнарын алар дезинфекциялиме? Күпме турист белән очрашалар бит!” 
Блогер Ләйлә Лерон бу талаудан котылу юлын да тәкъдим итә. Туганнарыгыз, дусларыгызны кисәтегез ди ул. “Һәр төшкән алырга мәҗбүриләсәләр дә, сатып алмыйча, юк итәргә дә була бит. Үзенең постларыгызда мэрия һәм шәһәрнең туризм буенча комитетын билгеләгез,  #скажинетзебрам хэштегын куеп, ямьсез кыланышлары турында языгыз. Шәһәребезнең бизәми торган бу талауларны туктатырга вакыт!” – ди ул.