Идеаль кыстыбый рецепты

Идеаль кыстыбыйны «Бәхетле»дә сатмыйлар, аны бары тик безнең әниләр һәм дәү әниләр генә пешерә белә. Бу аксиоманы инде күптән рәсми рәвештә танырга вакыт.

Дәү әни рецепты буенча кыстыбый болай пешерелә:

Бәрәңгене чистартып кисеп (ваграк булса да ярый, барыбер боламыкка әйләнәчәк) пешерергә куябыз. Бәрәңге пешкәч боламык ясыйбыз: бәрәңгегә бераз гына җылымса сөт, бер йомырка һәм күп итеп ак май салына һәм әйбәтләп изелә.

Бәрәңгеле лайфхак: бәрәңгене кайнап утырган суга салсаң ул тизрәк пешә һәм изелми; бәрәңге пешеп, суын агызгач, капкачын каплап 5-10 минут парландырсаң, ярмалырак була.

Камыр ясыйбыз: бер ярым стакан җылымса суга ярты бал кашыгы тоз һәм бер ярым кашык үсемлек мае салып болгатабыз. Әкренләп он өсти-өсти камыр басабыз. Камыр артык каты булыр дип курыксагыз бер бал кашыгы майонез өстәргә була.

Камыр артык йомшак та, артык каты да булмасын. Камыр басылып беткәч, аны ипи пакетына салып яки тастымалга төреп 5-10 минут тыныч ятарга калдырабыз. Аннан камырны 8-10 өлешкә бүләбез һәм тигез итеп, 5 мм да калынрак булмаган җәймәләр ясыйбыз.  Минем дәү әни кыстыбый камырының кырыйлары тигез булсын өчен тәлинкә ярдәмендә үлчәп кисә, ләкин бу матурлык өчен генә, минем кебек ялкау булсагыз? алай  эшләмәскә дә була. Камырны җилләмәсен өчен тастымал белән  каплыйбыз.

Җәйгән камырны җылытылган коры табада ике яклап кыздырабыз. Табада артык озак тотмаска һәм күп мәртәбә әйләндермәскә тырышыгыз, юкса камыр бөккәндә сына торган булачак.

Камырга боламыкны салып бөгәбез һәм майлы табага тезәбез.

 Ашларыгыз тәмле булсын! Кыстыбый ашарга кунакка үземне чакырсагыз да була!

Ә сез беләсезме, бәяләр үсә, киләсе елдан гел икра, ананас һәм стейклар гына ашап торып булмас… Бәрәңге белән ипи ашауга күчеп торырга кирәк булырга да мөмин. Бәрәңге белән ипи туйдырса, шәңгә, пирожки, һәм кыстыбый да ашарга була. Ә сез бәрәңгеле һәм камырлы тагын нинди ризыклар беләсез?