Сөй гомерне, сөй халыкны, сөй халыкның дөньясын!
  • Рус Тат
  • Реклама
    Яңалык/Эксклюзив
    • Яшь осталар көч сынашты «Үзегез сайлаган һөнәргә тулысынча бирелегез. Һәрчак камиллеккә барырга, үз эшеңдә иң яхшысына әйләнергә тырышырга кирәк»
      2854
      0
      6

    И ЗӨЛӘЙХА...

    Ләбиб Лерон шигырьләре журналның июнь санында басылды. 

    Ерак әбекәемә –

    әтием Леронның әбисе

    Зөләйхага багышлыйм

    И Зөләйха...

    Гаярь милләтемнең –

    Нәселемнең газиз баласы:

    Син шатлыгы булгансыңдыр аның,

    Булгансыңдыр кайчак ярасы.

    И Зөләйха...

    Тыйнак авылымның

    Җыйнак кызы – асыл кошы син:

    Хәят диңгезендә йөзгәнсеңдер,

    Йөргәнсеңдер, бәлки, очып син.

    И Зөләйха...

    Туган илкәемнең –

    Торган җиркәемнең күз нуры! –

    Күпме гашыйк егет җырлагандыр

    Сиңа багышлаган үз җырын:

    «Аклы-чуклы ал тасмаңны

    Тагып җибәр тәңкәңә.

    Шул егетне яратам, дип,

    Әйт, Зөләйха, әнкәңә...»

    И Зөләйха...

    Мәгърур ватанымның –

    Горур татарымның иркәсе:

    Бисмиллалап каршы алгансыңдыр

    Гомереңнең һәрбер иртәсен.

    И Зөләйха...

    Күпме нужа күргән,

    Михнәт кичкән татар хатыны:

    Ирең,

    Балаң,

    Халкың хакын хаклап,

    Гомер иткәнсеңдер – яктырып.

    Реклама

    И Зөләйха...

    Шөкер итә белгән

    Ак яулыклы татар карчыгы:

    Шәҗәрәмнең ныклы тамыры син,

    Хәтеремнең нәсел ярчыгы.

    И Зөләйха...

    Ак әбием минем...

    Ерак әбекәем... Кадерлем...

    Истәлеккә калган синнән бары

    Бер сурәтең белән... каберең.
     

    18 апрель, 2020 ел

     

    КАРЧЫК

    Бер күренеш һич исемнән чыкмый –

    Күз алдымда тора бик ачык:

    Коты качкан шыксыз хәрабә-йорт...

    Һәм... сөялгән аңа бер карчык.

    Ава төшеп кәкре таягына,

    Текәп җиргә өнсез карашын,

    Әллә терәү, әллә сорау булып,

    Басып тора карчык – чарасыз...

    Басып тора...

    Әрсез әҗәленнән

    Котылмакчы мәллә ул качып?

    ...Бу дөньяда күпме яшәгәнен

    Үзе белә микән ул карчык?

    Басып тора...

    Әллә посып тора,

    Ышыкланып зәһәр җилләрдән.

    Кыяфәтен күреп, инәләсең –

    Язмыш аны хәтәр җилгәргән!

    Пошаманга төшеп һәм бөрешеп,

    Нидер көтә кебек тирәлек...

    ...Карчык түгел, гүя әҗәл үзе

    Тора кебек йортка терәлеп.

    1 октябрь, 2019 ел

    Иң мөһим һәм кызыклы язмаларны Татмедиа Telegram-каналында укыгыз


    Нравится
    Поделиться:
    Комментарии (0)
    Осталось символов:
    Реклама
    • "Внесудебное банкротство гражданина"
    • Кышкы язылу өчен бүләк от!
    • ӘДӘБИ СУД. ИДЕЛ.
    • "Единый налоговый платеж"
    • «ИДЕЛ»НЕҢ ИҢ МАТУР ТЫШЛЫГЫ!
    • ИДЕЛ. ЯШЬЛӘР ШУРАСЫ
    • КАЛЕБ. ЯҢА ДУЛКЫН
    • "Платим налоги - создаем будущее сегодня! "
    • Kazan digital week
    • Потребуй чек! Проверь чек!