Йә, әйт әле...

***
Йә, әйт әле, мәшәкатьтән ар(ы)нып, 
бармы синең күккә бакканың?
Бармы күзәткәнең кояш чыгып, 
кичен алсуланып батканын?
Йә, әйт әле, карны шыгырдатып, 
бармы рәхәт тоеп узганың?
Тының кысылганда күкрәк тутрып 
сулаганың авыл тузанын?
Йә, әйт әле, бармы тик бер тапкыр 
тәгәрәшкән ак кар өстендә?
Бармы адашканың акыл белән 
морҗалардан чыккан төтендә?
Йә, әйт әле, бармы яңа пешкән 
ипекәйне сынд(ы)рып капканың?
Ахыр чиктә... бармы тик бер тапкыр 
тәрәзәдән тышка бакканың?