КАРТАЙСАМ ДА, КАЙНАР ҖИЛЛӘР КӨТӘМ...

Гамил Афзал шигыре

Картайсам да, кайнар җилләр көтәм,

Кайгы илләренә ашыкмыйм.

Һәр агачның җилфер-җилфер иткән

Яшел яфрагына гашыйкмын.

Бар начарны, бар яхшыны тоеп,

Көлә-көлә гомер буйладым.

Чәчәк исен иснәп туймадым мин,

Кояш нурын күреп туймадым.

Шатлык дәрьяларын кичәсем бар,

Күзем белән сөеп тамчысын.

Барча картлар кебек эчәсем бар

Хәсрәтнең дә иң-иң ачысын.