Кошлар сайравына сөю салдым

Илсөяр Илдус кызы Шиһапова тумышы белән Яшел Үзән районы Зур Өтәк авылыннан. Казан дәүләт мәдәният һәм сәнгать университетының театр факультетында режиссура бүлеген тәмамлый. Мәскәүдә сәхнә теле белгечлеген үзләштерә. Сценарийлар, шигырьләр яза. Тамашачы аны режиссер Рөстәм Рәшитов төшергән «Тапшырылмаган хатлар» фильмында яңгыраган «Галия җыры» аша (композитор Эльмир Низамов) яхшы белә.

Илсөяр Шиһапова – Казан дәүләт мәдәният институтының телевидение кафедрасы доценты; сәхнә теле, дикторлык осталыгы белгече. Педагогика фәннәре кандидаты.

Нигезем төшкә керә

...Шәһәрдәге таш фатирдан мине

Эзләп тапты авылымның җаны.

Х.Әюп

Алучысы табылганга

Кош тоткандай сөенеп,

Авылдагы өйне саттык

«Аллага шөкер» диеп.

Әби-бабайны җирләүгә

Узар-узмас бер атна,

Нәселебез күрке – нигез

Күчте башка кулларга...

Саттык йортны җиңел генә,

Уйлап тормыйча артык.

Зур эш эшләгән кешедәй,

Таш калага юл тоттык.

Аякка сарылып калды

Чүгәләп йөргән чирәм.

«Син дә кайтмаска китәсең», –

Дип шаулады карт имән.

Эленеп калды сарайда

Бабайның чалгылары,

Хуш ис бөрки сандык тулы

Әбинең сабыннары.

Озатып калды еламсырап

Яшьлекләр узган келәт.

Күзне йомсам, бабам йөри

«Авылым» көен көйләп.

Самавырга чыра телә

Ак яулыклы әбием...

Ыңгырашкан сыман булды,

Йозак элгәч, нигезем...

Үксеп калды арттан Акбай

Яңа хуҗалар көтеп.

Хыянәтем өчен мине

Карашы белән сөзеп...

Озатып калды моңсу гына

Бабай ясаган капка.

Әйтте сыман: син, энекәш,

Калдырдың безне ятка!

Бабаңнар салган нигез бу,

Атаң тәгәрәп үскән,

Кайгысын да, шатлыгын да

Тигез күтәргән, түзгән.

Әнкәң төшкән килен булып,

Басып ак мендәрләргә.

Сагынып кайда кайтырсың,

Зарларыңны сөйләргә?

Төшкә керә көн дә нигез

Шәһәрдән эзләп табып.

Кем баеган әле җирдә

Туган нигезен сатып?!

Бар да уза

Узмас дигән төннәр уза.

Килә, китә бәла-каза.

Һәр нәрсәнең ахыры бар,

Тузмас дигән башмак туза.

Газапның да чиге була.

Галәм киң ул, иркен сула.

Түкми-нитми саклау өчен

Кисмәкнең капкачы була.

Кайчак юктан күңел тула.

Тулсын, аннан җиңел була.

Агы-карасыннан күкнең

Дөньяларга ямьнәр тула.

Үтәлмәстәй киртәләр дә

Өмет тулы күңелләрдә

Юкка чыга булмагандай,

Сукмак ярып бәхетләргә.

Илсөяр Шиһапова