МИН - ХАТЫН-КЫЗ!

Гүзәл зат

Син – хатын-кыз, диләр миңа,
Аңлый алмыйлар холкым.
Иртән – кояш, кич – болыт мин,
Йә салкын мин, йә ялкын.
Син – гүзәл зат, диләр миңа,
Белмиләр чын дөресен.
Кирәк икән, ташны ярып,
Утка-суга керермен.
Ханбикә дә түгел үзем,
Фәрештә дә түгелмен.
Мин – гап-гади татар кызы,
Җырга гашыйк күңелем.
Мин – хатын-кыз! Кемдер өчен,
Апа, сеңел, әнимен.
Бар җылымны назга төреп,
Кадерлидер күңелем.
Син – хатын-кыз, дигән чакта,
Уйланам шулчак торып,
Беркем мәңге чишә алмас,
Калыйм табышмак булып!

Эльвира Фәнис кызы Әхмәтова 1978 елның 9 маенда Әгерҗе районы Кырынды авылында дөньяга килә. Алабуга дәүләт педагогия институтын тәмамлаганнан соң, телевидение, радио, мәгълүмат агентлыгында эшли. Медиа тармагында егерме ел буена эшләү дәверендә
төрле вазифалар башкара. Бүгенге көндә Республика матбугат һәм массакүләм коммуникацияләр агентлыгы җитәкчесенең беренче урынбасары. ТРның атказанган матбугат һәм массакүләм коммуникацияләр хезмәткәре. Гаиләдә ике бала үстерә. Иҗатка тартылуы нәселдән килә. «Әбием Фәүзә Әхмәтова шигырьләре район газетасында да басыла иде. Туганым Кырынды кызы Рәфилә Алиева – шагыйрә, җыентыклар авторы. Туганнан туган энем Раушан да шигырьләр, көйләр иҗат итеп, үзе башкара иде. Кызганыч, чечен сугышыннан кайтмады. Студент елларымда Алабугада яшәп иҗат итүче шагыйрь – туганым Фазыл Шәех белән эшләп алу бәхете тәтеде. Күзләре күрмәгәч, ул күңелендә туган юлларны әйтеп тора, мин яза барам. Авылдашым, язучы- шагыйрь Габдулла Галиев иҗаты да минем өчен үрнәк булды», – ди автор.