МИН РИЗА... (Резеда Гобәева шигыре)

***
Мин риза…

Җыр булып салынган авазның

Җан булып кайтуы хакына.

Шул җырга ымсынып, йолдызлар

Йөзәрләп, меңәрләп атыла…

Әрнетә күңелне

Өзлексез –

Җырланмый калганы, җан тырнап…

Атылган йолдызлар хакы бар –

Янып та куярсың ялкынлап…

Китмәскә сүз куеп,

Ашкыну

Алдапмы йөдәткән чагында,

Уеннар чын булып әйләнсә,

Хаклыкның йөзенә чалынма…

Көтәсе юлларда –

Үгетләү,

Үкенү, тәүбәләр, вәгъдәләр…

Ут бармы тәрәзә артында? –

Карадан тегелгән пәрдәләр…

Китәргә ашыкма.

Таңнарда

Бер җырга сыеша бар галәм.

Җилләрдә тирбәлә моң булып:

«Син минем бергенәм, бергенәм…»