МИН ТУГАНДА

Рифат Сәлах шигыре

Мин туганда, җирне моңга күмеп,
Сандугачлар сайрап торганнар...
Мин туганда, яшел яулык ябып,
Шаулап торган яшел урманнар...

Мин туганда кырда игеннәрнең
Башаклары тула башлаган...
Мин туганда яшел сыерчыклар
Су эчкәннәр безнең басмадан.

Мин туганда, кояш түргә менеп,
Җылы нурын чәчкән дөньяга...
Мин туганда, җиләкләре пешеп,
Алсуланып киткән Җир-ана...

Мин туганда чишмә челтерәве
Чыңлап торган яшел тугайда.
Мин туганмын алтын кәрәзләргә
Бал кортлары ширбәт җыйганда.

Мин туганчы, дөнья башка булган,
Мин тугачтын, дөнья үзгәргән...
Каян килсен җиргә мин булмагач,
Минем җанда туган йөз галәм.