Сөй гомерне, сөй халыкны, сөй халыкның дөньясын!
  • Рус Тат
  • Реклама
    ТАССР 100 ел
    Яңалык/Эксклюзив
    Видео
    • НАРКОТИКЛАРГА - ЮК

    Рифат Җамал шигырьләре

    Шагыйрь һәм фән докторы, профессор Рифат Җамал (Рифат Җамалетдин улы Корбанов) 1951 елның 1 октябрендә Татарстанның Арча районы Мирҗәм авылында дөньяга килә. Казан ветеринария институтында югары белем ала. Татарстан Республикасының атказанган фән эшлеклесе. Татарстан Язучылар берлеге әгъзасы.

    ***
    Гомер елгасында
    Баткан чаклар булды,
    Тик шулай да,
    Агымнарга ятып акмадым.
    Тормыш булгач
    Төрле хәлләр булды,
    Тик шунысы хак – 
    Сатылмадым hәм дә сатмадым.

    ***
    Исең китәр мәгърур буй-сынга,
    Җаны гына күптән буйсынган.
    Пыскып яна шәмнәр...
    Уй сүнгән.

    ***
    Олы кеше – солы төше…
    Коелып кала кибәк ише.

    ***
    Өйрәндем. Өйрәтмәдем.
    Чөнки беләм hәркемнең дә
    Үзенең өйрәнгәнен,
    Үзенең өйләнгәнен,
    Үзенең көйләнгәнен,
    Үзенең көйрәгәнен,
    Яңадан өйләнгәнен –
    Тормыштан өйрәнгәнен.

    ***
    Һәркем үзенчә яши...
    – Ул яшәми! –
    Димә, яшьти.

    ***
    Кулларым хәлсезләнсә дә,
    Күзләрдә очкын яна.
    Узып барган бер гүзәлне
    Күңелем кочты янә.

    ***
    Кеше яши өмет белән...
    Мин дә өметләнәм,
    Кайчагында шампан кебек
    Мин дә күбекләнәм.

    Тик күбек тиз юкка чыга,
    Калмаган шампаны да.
    Тик барыбер өметләнәм –
    Өметсез шайтан гына.

    ***
    Яраткан кешем бар, 
    Яраткан эшем бар.
    Ике, пар канат –
    Ярат та ярат!

    Равил Фәйзуллинны күреп

    Чакрым-чакрым йөзә, онытмыйча – 
    Зур шәхескә зур эш килешле...
    Дәрьяларны йөзеп чыгып була,
    Йөзеп чыгып булмый инешне.

    Инешләрне йөзеп чыгып булмый...
    Башмакларны салып,
    Иңнәренә асып,
    Чупыр-чупыр ләмгә басып
    Кичә аны 
    Олы агай да, 
    Маңка малай да.

    ***
    Кызык бу дөнья:
    Кеше
    Тугач та,
    Үлгәч тә
    Бер биләүгә сыя.

    Бәхетле кеше

    Туксанга җиткән. Аһ ормаган.
    Йокларга яткан да... тормаган.

    Реклама

    ***
    Сөешүләр булды
    Бик аздан.
    Гайбәтләре булды
    Бугаздан.

    ***
    Учактан ерак торсаң
    Туңар күзәнәкләрең.
    ...Тик күп күрдем учакта
    Янган күбәләкләрне.

    ***
    Урыс баеса да ярый – 
    Хет кәчтүн кидерәләр.
    Татарны – баймы, ярлымы –
    Кәфендә иңдерәләр.

    ***
    Кемдер урын бизи,
    Кемне урын бизи, 
    Урындагы гына
    Моны сизми.

    ***
    Алыштыралар Туган илне, 
    Модада алыштыру динне,
    Алыштырып торалар ирне...
    Инде тагын нәрсә димме?
    Оныттым ла әйтер сүземне!
    Искә төште: бик, бик теләсәң дә,
    Алыштырып булмый үзеңне.

    ***
    Бар да үтә, ләкин бар да
    Онытылмый бөтенләй –
    Әйтерсең лә, сүнгән учак
    Акрын гына төтенли.

    Ышанмасаң, яшьлегеңә
    Син бер борылып кара:
    Искә төшә яшьли сөйгән...
    Ябылмый татлы яра.

    ***
    Кәккүк тынды бик тиз. Унмы, унбиш...
    Санаргамы әллә соңардым?
    Моңсу. Тукта, шунысын яшим әле,
    Ә аннары... янә сорармын.

    ***
    Иң матур чагы урманның
    Көзләрен –
    Әйтерсең лә, Сабан туе
    Төсләрнең.

    ***
    Уйларыма абынып тукталам...
    Күпме башлар эчкән тустаганнан,
    Күпме башлар булган тустаган...

    ***
    Елгаларны туктаталар,
    Суларны була җыеп.
    Вакытны туктатып булмый,
    Була бары тик җуеп.

    ***
    Курыксаң, эшләмә,
    Эшләсәң, курыкма.
    ...Куркамын – язмасын 
    Басарга курокка.

    ***
    Ничә еллар инде сине күрми
    Тыныч кына, тып-тын яшим мин.
    Бүген төштә синең белән йөрдем
    Һәм аңладым – синсез ятим мин.

    ***
    Әллә алдый,
    Әллә алдамый...
    Өстәгерәкләрне аңлый,
    Астагыны аңламый.

    ***
    Татып карамыйча,
    Казның тәмен, 
    Кызның тәнен
    Белеп булмый.

    ***
    Яшь чагында –
    Аргамак,
    Олыгайгач –
    Арган ат. 

    ***
    Артка карап күпне күреп була,
    Алга карый белү кирәктер.
    Алдыңдагы зәгыйфь бер үсенте – 
    Киләчәктә мәгърур тирәктер.

    Иң мөһим һәм кызыклы язмаларны Татмедиа Telegram-каналында укыгыз


    Нравится
    Поделиться:
    Комментарии (0)
    Осталось символов:
    Реклама
    • Бөтенроссия халык санын алу (ИНФОГРАФИКА)
    • ВИЧ-инфекция
    • Квалификацияләнгән электрон имза алыгыз
    • ФИНАНС КУЛЬТУРАСЫ
    • Бергә сайлыйбыз!
    • "Язмыш" газетасы
    • Китап тыңла!
    • Kazan Digital Week-2021 (1)
    • ТАВЫШ БИР: Иң матур җырчы гаиләсе
    • Хәтер