Логотип Идель
Әдәбият

СЕЗ КАЙЛАРДА, ТАТАР УГЛАННАРЫ?

Марис Нәзиров шигыре

Марис Нәзиров шигыре

Чорлар аша, әрнеп, үткәннәргә,

Халкым тарихына карадым:

Җил-давыллы язмыш йомычкадай

Җилтерәткән милләт корабын.

Сез кайларда, татар угланнары,

Җан асрыйсыз кайсы илләрдә?!

Кан тартмаса, бәлки, җан тартадыр,

Сөйләшәсез нинди телләрдә?!

Яр ташына кораб сугыла да

Чигә кабат упкын-диңгезгә.

Фәләстиннәр кебек бәйсез илен –

Үз дәүләтен йөри ул эзләп.

Сез кайларда, татар угланнары,

Кайсы кыйтга, кайсы җирләрдә?!

Кан тартмаса, бәлки, җан тартадыр,

«Әнкәй!» – дисез нинди телләрдә?!

Дулкын куган кораб адашмасын –

Акчарлаклар булып ялварам:

«Җил-давылда маяк кабызыйк без,

Очрашырга ерак ярлардан!»

Сез кайларда, татар угланнары,

Калдырасыз мирас кемнәргә?!

Кан тартмаса, бәлки, җан тартадыр,

«Әнкәй!» – дисез нинди телләрдә?!

«Идел», №1, 1994 ел

Текст после содержания указынный в настройках

«Идел» журналы 16+

Следите за самым важным и интересным в Telegram-каналеТатмедиа

Нет комментариев