СӨЮ – МӘҢГЕ, УЛ ДА ЧИКСЕЗ ГАЛӘМ КЕБЕК!

Оксана Ильюп Башкортстанның Салават районы Лаклы авылында туып үсә. Мәктәпне тәмамлагач, Чиләбегә китә, әүвәл техникумда, аннары Хезмәт һәм социаль мөнәсәбәтләр академиясендә укый. Шигырьләрне ун яшеннән яза башлый. Соңрак җырлар язарга һәвәслеген дә төшенә. Һәм... лицензияле «Чәчәкләр гаеплеме» дип исемләнгән альбом чыгаруга ирешә. Узган ел тәүге шигырь китабы да дөнья күргән! Бүгенге көндә ул Чиләбе халык театрында уйный. (Сүз уңаеннан, былтыр театр Бөтенрусия «Идел-йорт» театр фестивалендә Гран-прига лаек булган иде.) Сәяхәтләр ярата. Кайсы гына шәһәрдә булса да, татар мохитен табып, очрашулар, иҗади кичәләр оештыра.

***

Җаннар күптән таныш безнең.
Җиңел генә булмас аңлап,
тик гасырлар арасыннан
эзләп таптым сине кабат.
Кабат! Сиңа гашыйк бүген!
Йөрәк түзми: дулый, дулый!
Бу дөньяда беркемне дә
инде сиңа тиңләп булмый.
Коңгырт-яшел күзләреңдә
гүя кояш нуры качкан;
иреннәрең миңа диеп
оҗмахларны гүя ачкан.
Бармакларым асларында
кыллар чыңлый.
Җырлыйк, әйдә!
Җаннар шушы кыллар белән
бәйләнгәнме икән әллә?
Алар инде күптән таныш.
Шуңа сине сөю ансат.
Мең гасырлар арасыннан
эзләп таптың мине.
Кабат!

***

Ак чәчәкләр өзелә дә чәчкә куна –
Дөньяны күк, мине бизи – мин өлеше.
Мин ярашлык таптым Җирдә яшәвемдә:
Үзәгемдә – Галәм аңы, Галәм көче.
Вакыт ватык – аны ерып чыгып була.
Гүя агым елга: ега, нидер сөйли.
Ә хыялым – кул сузымы ераклыкта.
Һәм йөрәкне иксез-чиксез рәхмәт били!
Хыялларга иң кыска һәм туры сукмак –
Ихлас рәхмәт.
Рәхмәт шушы тормыш өчен!
Бәхет – миндә! Һәр вакыйга – минем дәвам.
Мин үзем дә шул Галәмнең бер өлеше.
Анык аңлыйм – ни көтәргә? Нәрсә өчен?
Нинди куәт тупланганын төгәл беләм.
Кичә чәчкән орлык-уйлар чәчкә аткан –
Өзелә дә, чәчкә куна берәм-берәм...

Оксана Ильюп

Шулай ук укыгыз: Оксана Ильюп «Телне белсәң, язасың килсә, хет космоста яшә»