ЯКТЫ КӨН ТУГАНГА СӨЕНӘМ

БУЛСА ӘГӘР МИНДӘ ТЫЛСЫМ КӨЧЕ...
Булса әгәр миндә тылсым көче...
Селкеп куеп тылсым таягын,
Коляскада утыручы кызның
Тиз төзәтер идем аягын.
Рәхәтләнеп чабып китәр иде,
Урын өстендәге малай да,
Күзлекләрен салып ташлар иде
Капка төбендәге бабай да.
Әбиләр дә җилдән җитез йөрер,
Әниләр дә авырып ятмаслар,
Әтиләр да бер аякка аксап,
Көчкә өйләренә кайтмаслар...

КОШЛАР ҖЫРЫ
Язгы кичтә кошлар сайрый,
Берсен-берсе уздырып.
Рәхәтләнеп шуны тыңлыйм,
Чәчләремне туздырып.
Минем өчен бишек җыры
Җырлый алар, күрәмсең.
Өнемдә дә, төшемдә дә
Күрәм кошлар сурәтен.
Питрау җитсә, кошлар тына
Яме бетә кичләрнең.
Җәйге озын, матур кичтә
Мин аларсыз нишләрмен?

СЫЕРЧЫКЛАР КАЙТКАЧ
Эх, булмады, өлгермәдек,
Сыерчыкка өй «салып».
Алар инде күптән кайтты
Сөенеп, канат кагып.
Үзебезгә өй өлгерттек,
Сыерчыкка булмады,
Шуңа алар сайрый-сайрый,
Йорт каршына кунмады.
Сыерчыгым, үпкәләмә,
Тырышырбыз, төзербез.
Икебез дә бәхет, шатлык
Дулкынында йөзәрбез.

Илһамия Линар кызы Гыйззәтуллина Яшел Үзән районы Осиново бистәсеннән. С.К. Гыйматдинов исемендәге гимназиянең X сыйныфында белем ала. Фортепианода уйнау, шигырь язу, социаль челтәрләрдә ана телебездә эчтәлекле постлар язу да аның яраткан шөгыле. Иҗатка мәхәббәт дәү әтиләреннән һәм әнисеннән күчкән. Укытучысы Гөлгенә Кормановага да рәхмәтле Илһамия, татар теле дәресләрендә өйгә эш итеп юкка гына шигырь язарга кушмаган! 2019 елда аның «Ак халатлы фәрештә» шигыре «Казан утлары» журналы оештырган «Шифалы куллар» әдәби конкурсында кызыксындыру бүләгенә ия булды.