ЯРАТУ ЯШӘСЕН ЙӨРӘКТӘ

Диңгезләр, дәрьялар киңлеге кадәрле
Ярату яшәсен йөрәктә.
Булсын ул сихри хис җиһанга карата,
Аллаһка карата бигрәк тә!
Кояшның яктысын узарлык булсачы
Күңелне яктырткан нур-иман.
Кешеләр, табигать өчен күп изгелек,
Яхшы эш кылынсын кулымнан.
Күп күрдем тормышта соклангыч матурлык,
Әле мин күрмәгән – хисапсыз!
Бар нәрсә – Аллаһның бүләге, иҗаты.
Без булмас идек ул иҗатсыз.
Үлән дә, бөҗәк тә – кешегә катлаулы,
Аллаһка галәм дә – җиңелдән.
Кем дә кем Аллаһка буйсынмый, табынмый,
Ул кеше, мәгълүм ки, җиңелгән.
Аллаһка карата чиксезлек кадәрле
Ярату яшәсен йөрәктә!
Аллаһның ярдәме, рәхмәте безләргә
Һәрвакыт, һәр җирдә кирәк лә...

Дания Нәгыйм