ЙӨРӘКТӘ ТОТАШТАН КӨЗ БУЛГАЧ...

Ләйлә Фаяз шигыре

***
Йөрәктә 

тоташтан көз булгач,

җилләре, котырмый, нишләсен?..

Син генә

наз тулы сүзләрдә

салкынлык гамьнәрен ишетәсең.



Бер сиңа

исбатлый-исбатлый,

мин үзем мең кабат ышандым –

сыеныр кочагың

булганда,

куркытмый суыгы кышларның.



Мең кабат төшендем... зур ялгыш –

саклавы хатирә киштәсен.

Йөрәктә

тоташтан көз булгач,

җилләр соң, котырмый, нишләсен?..