2023 елда электрон паспортларга күчәчәкбез

Россия 2023 елда – элек планлаштырылганнан ике елга иртәрәк пластик паспортларга күчәргә мөмкин. Бу хакта илдә шәхеснең электрон таныклыгын кертү турындагы киңәшмәдә РФ Премьер-министры Дмитрий Медедев сөйләде, дип хәбәр итә РИА Новости.
«Күрәсең, без кәгазь паспортларны кулланудан, чыннан да, тизрәк баш тарта алабыз. Менә моны башта планлаштырылганнан ике елга иртәрәк, ягъни 2023 елда эшләргә дигән тәкъдим бар", - дип аңлатты Премьер.
Шул ук вакытта Россия Хөкүмәте башлыгы вакыт җитмәүгә бәйле рәвештә, электрон паспортның төп параметрларын, шул исәптән яклау ысулларын да, тизрәк билгеләргә чакырды. Моннан тыш, Медведев паспортның яңа төренә күчүне уңайлы итәргә һәм гражданнар, барыннан да элек, өлкән кешеләр тарафыннан яңа документкаигътибар белән карарга өндәде.
Вице-премьер Максим Акимов электрон паспортлар бирү 2020 елның июлендә башланачак, ә кәгазь паспортлар 2022 елда бирелүдән тукталачак, дип сөйләде.
Киңәшмәдән соң Хөкүмәт Рәисе урынбасары журналистларга яңа документ үрнәген күрсәтте. Ул пластик банк картасы зурлыгында. Аның сүзләренә караганда, электрон паспорт тормышта үзгәрмәгән һәм ун ел дәвамында гамәлдә булган мәгълүматны үз эченә алачак. 

Ибәтуллина Илүзә