Быелгы Җәдид фест Яңа Татар бистәсенең 270 еллыгына багышланган булачак

Быел JADID FEST фестивале программасы Яңа Татар бистәсенең 270 еллыгына багышлана.

Фестиваль 10-15 декабрь көннәрендә узачак. Төп вакыйгалар «Меховой квартал» сәүдә үзәге бинасында (М. Гафури ур., 50, корпус 1) үтәчәк. Җәдид фест кунаклары күргәзмәләр һәм төп чаралар - лекцияләр, концерт, балалар һәм яшүсмерләр өчен остаханәләр, перфоманслар карый алачак.

JADID FEST чарасы 2015 елдан башлап ел саен үткәрелә. Быел ул иҗади форматларны файдаланып, туган якны тарихи өйрәнү характерына ия булачак. Фестивальнең максаты – Яңа Татар бистәсенең тарихи-мәдәни мирасын популярлаштыру.

Беренче тапкыр JADID FEST бистәнең чын бәйрәме булачак: аерым алганда, 14 декабрьдә фестивальнең төп бинасында дизайн-маркет, балалар өчен мастер-класслар сериясе, акустик концерт узачак.

Фестивальдә шулай ук Мәдәният министрлыгы белән уртак - ТАССРның 100 еллыгына багышланган медиапроект ярдәмендә бистә турында истәлекләр җыю планлаштырыла.