Алабугада - "Таҗи Гыйззәт елы"

Алабуга Үзәк китапханәсендә драматург Таҗи Гыйззәтнең 125 еллык юбилее һәм ТАССРның 100 еллык уңаеннан, «Гыйззәт кабызган чаткылар» дип исемләнгән чара уздырылган. Бу турыда tatar-inform.tatar хәбәр ителә.

Бәйрәмгә Казаннан мәртәбәле кунаклардан татар әдәбияты белгече, филология фәннәре докторы, Татарстан Язучылар берлеге әгъзасы Фоат Галимуллин, Европа телләре һәм мәдәнияте кафедрасы профессоры күренекле драматург оныгы Гүзәл Гыйзәтова чакырылган. Ул әтисе Казбек Таҗи улының китапларын бүләк иткән.

Таҗи Гыйззәтне Алабугада сагынып искә алалар. Аны Алабуга театрына нигез салучы дип юкка гына әйтмиләр.

"Ул 40 ка якын драма әсәре иҗат иткән. Аларның күбесе театр сәхнәләрендә куелып, тамашачының күңелендә төрле-төрле хисләр, фикерләр уяткан, язучының үзенә шөһрәт, данлыклы исем китергән. Таҗи Гыйззәт биографиясенең берничә сәхифәсе Алабуга шәһәре белән бәйле. 1925 елның сентябрендә хатыны, ике баласы белән Таҗи Гыйззәт Алабугага килеп төшә. Ул Алабуга педагогия техникумына хуҗалык эшләре буенча мөдир булып эшкә урнаша. Т.Гыйззәт тиз арада комсомол һәм профсоюз җитәкчеләре белән бәйләнешкә кереп, яңа тәртипләр урнаштыра. Егетләр һәм кызлар торакларына берәр җаваплы студент билгели. Аның инициативасы белән һәрбер кыз берәр студент егеткә шефлык итәргә, аның тегү-ямауларын, чиста-пөхтәлеген, тәртипләрен күзәтергә тиеш була", - дип язалар Алабуга Үзәк китапханәсе сайтында.