Алдынгы почтальоннарны бүләкләделәр

Күркәм гадәт буенча, 19 апрель көнне, “Татмедиа” агентлыгында унберенче мәртәбә республикабызның иң яхшы хат ташучыларын һәм почта бүлекчәләрен котладылар.

Әлеге конкурс “Татмедиа” тарафыннан, “Татарстан почтасы” белән берлектә, 2013 елдан бирле уздырыла. 2019 елның беренче яртыеллыгында иң яхшы эшләүче почтальоннарны ачыклау, аларның эш стимулын арттыру өчен бәйгенең приз фонды быел күпкә үстерелгән. Конкурста катнашуның төп шарты исә – хат ташучы һәм почта бүлекчәсе узган ел белән чагыштырганда “Татмедиа” оешмасына караган газета-журналларга язылучылар санын арттырырга тиеш. Бәйгедә 29 хат ташучы һәм 41 почта бүлекчәсе үз көчләрен сынап караган. “Иң яхшы авыл почтальоны” номинациясендә быелгы җиңүчеләр исә: Нурия Басыйрова (Актаныш), Екатерина Зәйнуллина (Балтач), Нурсинә Җиһаншина (Чирмешән). “Иң яхшы кече шәһәр почтальоны” номинациясендә беренчелеккә Нурия Шәкурова (Мамадыш) чыккан. “Иң яхшы шәһәр почтальоны” Чистайда яши икән. Ул – Надежда Кольцова. “Иң яхшы почта бүлекчәләре” номинациясендә Октябрьский (Югары Ослан), Яңа Әлем (Актаныш), Мамадыш, Урта Көшкәт (Балтач), Яңа Элмәле (Чирмешән) почта бүлекчәләре җиңү яулады. Журналларга язылу буенча Арча районының Мөндәш һәм Кукмара районының Ядегәр авыллары почта бүлекчәләренә тиңнәр булмаган. Җиңүче почтальоннар 15әр мең сум, ә почта бүлекчәсе 30ар мең сум акчалата приз, диплом һәм чәчәк белән бүләкләнде.