Алексей Морозов - КХЛның яңа президенты булды!

Казан "Ак Барс" ының элеккеге капитаны Алексей Морозов Континенталь хоккей лигасының (КХЛ) яңа президенты булды.

Әлеге карар КХЛның Директорлар советының чираттан тыш читтән торып уздырылган утырышында кабул ителде. Алексей Морозовны лига президенты итеп сайлау өчен барлык директорлар советы әгъзалары тавыш биргән. Шуның белән бер үк вакытта ул оешманың яңа җитәкчесе сайланганчы Яшьләр хоккей лигасы (КХЛ) идарәче директоры вазифасын да саклап калачак.

"Алексей хоккей дөньясында, уенчылар, тренерлар, клуб менеджерлары, журналистлар һәм, әлбәттә, җанатарлар арасында зур абруйга ия", - диде КХЛның Директорлар советы рәисе Геннадий Тимченко.

Элегрәк КХЛның элеккеге президенты Дмитрий Чернышенко Россия Хөкүмәте Рәисе урынбасары булган иде. Вице-премьер вазыйфасында ул Мәдәният министрлыгы, Спорт министрлыгы, Цифрлы үсеш, элемтә һәм массакүләм коммуникацияләр министрлыгы, шулай ук профильле федераль агентлыклар белән эшләячәк.

"Ак Барс" составында Алексей Морозов ике тапкыр Гагарин кубогына ия булды һәм берничә ел дәвамында команда капитаны булды. Шулай ук ул Мәскәүнең "Крылья Советов" һәм ЦСКА, шулай ук Милли хоккей лигасы (NHL) "Питтсбург Пингвинз" клубы өчен чыгыш ясады. Россия җыелма командасы составында ул ике тапкыр дөнья чемпионы булды.

inkazan.ru