Җанатарларсыз хоккей

"Ак Барс" - "Салават Юлаев" Көнчыгыш конференциясенең ярымфинал матчлары җанатарларсыз уздырылачак. Хоккей клубы матбугат хезмәте хәбәр иткәнчә, әлеге карар Татарстан территориясендә махсус санитар-эпидемиологик режим кертүгә бәйле.

18 һәм 20 мартта "Салават Юлаев"ка каршы матчларга билетлар сатып алган җанатарлар үз акчаларын кире кайтара ала. Әгәр билет "Татнефть Арена" кассасында сатып алынган икән, анда паспорт белән килергә һәм акчаларны кире кайтаруга гариза рәсмиләштерергә кирәк. Онлайн-билет сатып алучылар гариза формасын тутырып, аны электрон адрес буенча җибәрә ала: ticket@mail.tatneftarena.ru.

"Ак Барс" үз җанатарларын телевизор экраннары һәм башка электрон җайланмалар аша җан атарга чакыра, әмма кафе, рестораннарда, һәм башка җәмәгать урыннарында матчларны караудан тыелырга киңәш ителә. Матчлар "ТНВ", "ТНВ-Планета", КХЛ системасы телеканаллары трансляцияләнәчәк. Шулай ук "ВКонтакте" клуб берләшмәсендә "Ак Барс ТВ" клуб телевидениесе дә гадәти режимда эшләячәк.

Исегезгә төшерәбез, Татарстанда коронавирус аркасында махсус режим кертелде. Режим күп кеше катнашында чаралар үткәргәндә кайбер чикләүләрне күздә тота.

inde.io

Фото: Ильнар Тухбатов