АЙДАР ФӘЙЗРАХМАНОВ ЯҢА ПРОГРАММА ТӘКЪДИМ ИТӘ

Габдулла Тукай исемендәге Татар дәүләт филармoниясендә  Россиянең атказанган, Татарстанның халык артисты Айдар Фәйзрахмановның   «Олы юл әйтте..» циклыннан «Ышаныч» дип аталган яңа программа булачак.

30 гыйнвар көнне булачак концертта Татарстанның Халык шагыйре Равил Фәйзуллин әсәрләре алынган. Шигъри музыкаль программада шагыйрь үзе, Айдар Фәйзрахманов, Камал театры артисты Ришат Әхмәдуллин башкаруында  шигырләр, Равил Фәйзуллин шигырьләренә төрле елларда иҗат ителгән җырлар яңгырый.

Концертта җырчылар Филүс Каһиров, Айгөл Хәйри, Айдар Сөләйманов,  Алинә һәм Азат Кәримовлар, Сиринә Зәйнетдинова, Рөстәм Насыйбуллин, Илгиз Мөхетдинов; Татарстан республикасы фольклор музыкасы дәүләт ансамбле (сәнгать җитәкчесе – Россиянең атказанган, Татарстанның халык артисты Айдар Фәйзрахманов); «Мирас» инструменталь ансамбле (сәнгать җитәкчесе –Татарстанның атказанган артисты Рөстәм Рәхмәтуллин);  Татарстанның атказанган артисткасы Алсу Барышникова (фортепиано), халыкара конкурслар лауреаты Ильяс Камал (виолончель) катнаша.

«Татар-информ»да  концертның онлайн трансляциясе барачак.