Азмун Питерда да Азмун

Казан футбол сөючеләренең яраткан уенчысы Сердар Азмун "Зенит" өчен яңа гына уйный башлап, ике гол кертеп, бер пас бирергә өлгерде.

Билгеле булганча, әле күптән түгел генә "Рубин" һөҗүмчесе Санкт-Петербургның "Зенит" командасына күчте. Төньяк башкала клубына Казаннан уенчыларның күчүенә без инде күнегеп беттек. Заманында Рязанцев, Бухаров, Нобоа, Нәбиуллин кебек сәләтле уенчылар Петербургка күчә торды һәм шактые күз уңыннан югала да барды. Азмунның теләге, әлбәттә, Европага күчү иде. Әмма, беренчедән, анда аны алай ук көтеп тормыйлар бугай. Икенчедән, финанс кыенлыклары кичергән бер чорда "Рубин"ның уенчыны "Зенит" сатуы өч як өчен дә файдалы булгандыр дип уйларга кирәк.

Әлеге файданы Сердар Азмун "Зенит" өчен инде хәзер үк раслый башлады. Европа Лигасының 1/16 финалында питерлылар Төркиянең "Фенербахче" командасына каршы уйнады. Беренче очрашу төрекләр файдасына тәмамланды. Җавап очрашуында Азмун шулай ук "Рубин"ның элеккеге уенчысы Мөхәммәт Оздоевка гол кертергә ярдәм итте, аннан соң инде үзе дә ике туп кертергә өлгерде. Нәтиҗәдә, "Зенит" ярышларның 1/8 финалына юллама алды.