Башкорт театры килә

Сентябрьдә Татарстан тамашачысын күңелле яңалыклар көтә: безгә башкорт артистлары киләчәк. Бу хакта “Татар-информ” үткәргән матбугат очрашуында билгеле булды.

16-19 сентябрь көннәрендә Казанда Башкортстан Республикасының Милли яшьләр театры гастрольләре узачак. Зурдан купкан ут күршеләребез: Башкортстан республиканың 100 еллыгы, халык шагыйре Мостай Кәримнең тууына 100 ел тулуга багышланган аларның гастрольләре. 16 сентябрьдә Г.Камал исемендәге Татар дәүләт академия театры сәхнәсендә М.Бурангуловның “Башкорт туе” әсәре сәхнәләштерелә. Башкортларның милли туй йолаларын үз эченә алган зур тамаша ул, нигезендә романтик драма ята. 17-19 сентябрьдә гастрольләр Г.Кариев исемендәге Казан татар дәүләт яшь тамашачы театры бинасында дәвам итәчәк. Кичке спектакльләрдән: “Было бы денег мешок” һәм “Радость нашего дома”. Балалар өчен өч әкият күрсәтеләчәк: “У ковчега в восемь”, “Волшебная мельница”, “Чиполлино”, бу безнең әти-әниләргә күңелле яңалык. Афишаларны карап барыгыз!