"Белем җәүһәрләре"нә гаризалар кабул ителә

"Белем җәүһәрләре" Бөтендөнья интернет-проектлар бәйгесе татар телендә ясалган, мәгариф һәм мәдәният өлкәсе белән бәйле интернет-ресурсларны барлау, аларны популярлаштыру, әлеге интернет-ресурс авторларына ярдәм күрсәтү максатыннан, җаваплылыгы чикләнгән "Белем.ру" җәмгыяте инициативасы, Татарстан Республикасы Мәгариф һәм фән министрлыгы, Татарстан Республикасы Мәдәният министрлыгы, Татнетны үстерү фонды һәм күп санлы иганәчеләр ярдәме белән оештырыла.

Бәйге 2010 елдан башлап ел саен үткәрелеп килә. Бәйгедә татар телендә эшләп килгән файдалы интернет-проект авторлары катнаша ала. Бәйгедә катнашырга теләгән интернет-проект авторларыннан гаризалар кабул итү февраль аенда башлана һәм сентябрь аенда тәмамлана. Октябрь аенда тантаналы рәвештә бәйгенең җиңүчеләре бүләкләнелә.

Гаризаны belem.ru сайтында калдырырга була.

Әгәр сезнең кызыклы Инстаграм сәхифәгез яки Вконтактеда шәп группагыз, дөньяга күрсәтергә теләгән сайтыгыз яки электрон җайланмалар өчен кушымтагыз булса, бу проект сезнең өчен!